Նիդերլանդները կշարունակի կորոնավիրուսի պատճառով ձեռնարկված սահմանափակող միջոցառումների թուլացումը: Այս մասին հայտնում է ТАСС-ը՝ հղում տալով երկրի վարչապետի հայտարարությանը:
Նիդերլանդների վարչապետ Մարկ Րյուտտեն երեքշաբթի տեղի ունեցած մամուլի ասուլիսի ժամանակ հայտնել է, որ հունիսի 1-ից համապատասխան պայմանների ապահովման պարագայում կբացվեն սրճարանները, ռեստորանները, բարերը, թատրոններն ու կինոթատրոնները, ինչպես նաև թանգարանները:
Նրա խոսքով՝ վարակումների և հոսպիտալացումների թիվը նվազում է, «այդ պատճառով խստացված միջոցառումների թուլացումը շարունակվում է»: «Մենք արժանացել ենք սրան այն բանի շնորհիվ, որ հետևում ենք փորձագետների ցուցումներին»,- ընդգծել է նա,- «Միևնույն ժամանակ, մենք պետք է շարունակենք հետևել կանոններին, քանի որ գիտենք, որ վարակը կարող է կրկին սկսվել և արագ տարածվել»:
Րյուտտեն նաև ընդգծել է, որ հիմնական ցուցումները կմնան անփոփոխ՝ միմյանցից 1.5 մ հեռավորության պահպանում, ձեռքերի հաճախակի ախտահանում և այլն:
