ՀՀ վարչապետի տիկին Աննա Հակոբյանը ֆեյսբուքյան իր էջում տեսանյութ է հրապարակել, որտեղ անդրադարձել է երեկ՝ մայիսի 5-ին, Երևանում տեղի ունեցած ահասարսուռ, ողբերգական դեպքին: Տեսանյութը հետեւյալ գրառմամբ է. «Ինչո՞ւ են կանայք միշտ մեղավոր»:
Խոսքը 40-ամյա տղամարդու և նրա երկու մանկահասակ երեխաների ողբերգական վախճանի մասին է, երբ հայրը 9-րդ հարկի իրենց բնակարանի պաշգամբից դուրս էր նետել 5 եւ 7 տարեկան երեխաներին, ապա ինքը նետվել:
Վարչապետի տիկինը ուշադրությամբ հետեւել է դեպքի վերաբերյալ մամուլի հրապարակումներին, հարեւանների՝ դրանցում տեղ գտած կարծիքներին, ինչպես նաեւ համացանցում ու հատկապես ֆեյսբուքում սկսված քննարկումններին:
Աննա Հակոբյանը անդրադառնում է դեպքի հանրային ընկալմանը, հնչող և հնչած կարծիքներին ու գնահատականներին, հրապարակվող «դատավճիռներին»:
Նա նշում է, որ առաջին հարցը, որ առաջ էր գալիս այն էր, թե ինչը կարող էր նման քայլի պատճառ դառնալ: Թվարկում է դեպքից հետո առաջ քաշված վարկածները, ապա ինքն իր վարկածն առաջարկում:
«Ի տարբերություն հարեւանների, համացանցում, մասնավորապես ֆեյսբուքյան տիրույթում, շատ ավելի լուրջ դիրքորոշումներ եւ վերջնագրերով արտահայտություններ եղան: Եվ այստեղ ոչ թե վարկածներ էին առաջ քաշվում այլ գերակշռում էր մեկ վարկած, ըստ էության կարող ենք ասել, որ ֆեյսբուքյան դատաքննություն տեղի ունեցավ եւ արդեն (դեպքի) օրվա ավարտին դատավճիռ արձակվեց: Դատավճիռն այն էր, որ կատարվածի մեղավորը կինն է, 40-ամյա տղամարդու կինը, երկու մանկահասակ երեխաների մայրը: Այս վարկածը վերջնական էր, անբեկանելի»,- նշել է Աննա Հակոբյանը:
The post Ինչո՞ւ են կանայք միշտ մեղավոր. Աննա Հակոբյանն անդրադարձել է երեկ Երեւանում տեղի ունեցած ողբերգական դեպքին appeared first on ԳԱԼԱ.