Սիրիական Իդլիբ նահանգում տիրող իրավիճակի կարգավորմանն ուղղված ռուս-թուրքական բանակցությունները Մոսկվայում կշարունակվեն երեքշաբթի: РИА Новости-ի փոխանցմամբ՝ այս մասին ասվում է Թուրքիայի ԱԳՆ ներկայացուցչի հայտարարության մեջ:
Սիրիայի հարցով բանակցությունների առաջին փուլը, Սիրիայի հյուսիսարևմտյան շրջանում իրավիճակի սրման ֆոնին, կայացել է անցյալ շաբաթ Անկարայում: Միջգերատեսչական ռուսական պատվիրակության կազմում ընդգրկվել են ՌԴ նախագահի՝ սիրիական ճգնաժամի կարգավորման հարցերով հատուկ ներկայացուցիչ Ալեքսանդր Լավրենտևը և փոխարտգործնախարար Սերգեյ Վերշինինը, ինչպես նաև պաշտպանության նախարարության ներկայացուցիչներ: Թուրքական պատվիրակությունը բանակցություններում գլխավորում է փոխարտգործնախարար Սեդաթ Օնալը:
Բանակցությունների երկրորդ փուլը մեկնարկել է այսօր: Նշվում է, որ քննարկումների ընթացքում թուրքական կողմն ընդգծել է տարածաշրջանում լարվածության անհապաղ նվազեցման անհրաժեշտությունը: Միջոցներ են քննարկվել, որոնք կարող են ընդունվել հրադադարի խախտումները կանխելու համար: Քննարկումը կվերսկսվի վաղն առավոտյան:
Հիշեցնենք, որ լարվածությունը Իդլիբում սրվել է վերջին շաբաթվա ընթացքում, երբ Թուրքիան, հայտարարելով, որ սիրիական կառավարական ուժերը հրետակոծության են ենթարկել իրենց դիտակետերը, պատասխան կրակ էր բացել սիրիացի բանակայինների դիրքերի ուղղությամբ:
