Պետք է օժանդակությունն ըստ կարիքի ավելի շատ լինի․Շահան Գանտահարյանը` սիրիահայերին միջազգային օգնություն ցուցաբերելու անհրաժեշտության մասին
Լիբանանյան «Ազդակ» թերթի խմբագիր Շահան Գանտահարյանի խոսքով՝ հայաստանյան դիվանագիտությունը պետք է շատ աշխատանք տանի, որպեսզի միջազգային ընտանիքը որոշակի բյուջե նախատեսի սիրիահայերին Հայաստանում օժանդակություն ցուցաբերելու համար:
Նա Tert.am-ի հետ զրույցում նշեց, որ կարծում է, այնուամենայնիվ, որոշակի օգնություն Հայաստանը ստացել է սիրիահայերին աջակցելու համար: «Պետք է օժանդակությունն ըստ կարիքի ավելի շատ լինի: Կարծում եմ, որ այստեղ նաև մեր արտաքին դիվանագիտությունը համախորհուրդ միջազգային կառույցների համապատասխան բաժանմունքների հետ կարող է իրականացնել որոշ ծրագրեր»,- ասաց նա:
Շահան Գանտահարյանը չհամաձայնեց, որ Թուրքիան կարողացել է Սիրիայից գաղթականների հաշվին օգուտներ քաղել միջազգային հանրությունից: «Թուրքիան միայն կարողացավ կարճատև օգուտներ քաղել: Եթե վաղաժամկետ կտրվածքով նայենք, մենք կտեսնենք, որ այդ փախստականների հոսքը, որ Թուրքիայից գնաց Եվրոպա, ստեղծեց շատ լուրջ ճգնաժամ Եվրոպայի համար: Հետո ամբողջ աշխարհը գիտակցեց, որ այդ փախստականների հետ նաև ահաբեկիչներ ներթափանցեցին Եվրոպա, մարդասիրական և ֆինանսական ճգնաժամի հետ մեկտեղ, ստեղծվեց նաև ապահովական ճգնաժամ և դրա հետևանքով էլ շատ լարվեց Եվրամիություն և Թուրքիա հարաբերությունները»,- նշեց նա:
Նրա խոսքով, ի վերջո, սիրիացի փախստականներին ցուցաբերված օգնությունը նպատակին չօգտագործելու պատճառով այսօր կասեցվել է Թուրքիայի՝ Եվրամիությանն անդամակցելու հարցը:
Հիշեցնենք, որ ԱՄՆ կոնգրեսականներին Ազգային ժողովում ընդունելու ժամանակ անդրադարձ է կատարվել Սիրիայի փախստականների խնդրին. ՀՀ ԱԺ փոխնախագահը նշել էր, որ Հայաստանը Սիրիայից փախստականների ընդունման հարցում Եվրոպայում առաջատարներից է: Հաջորդ օրը Tert.am-ի հետ զրույցում սփյուռքի նախարար Հրանուշ Հակոբյանը նշել էր, որ գնում է Կոնգրեսականների հետ սիրիահայերի համար ֆինանսական աջակցություն ստանալու հարցը քննարկելու:
Հիշեցնենք նաև, որ նախագահ Սերժ Սարգսյանը Նյու Յորքի ՄԱԿ-ի կենտրոնակայանում Գլխավոր ասամբլեայի 72-րդ նստաշրջանին իր ելույթում նշել էր, որ Հայաստանը պատրաստակամ է մասնակցելու Սիրիայում ՄԱԿ-ի ներքո խաղաղարար ջանքեր ձեռնարկելու շուրջ հնարավոր քննարկմանը:
Հատկանշական է նաև, որ այսօր ԱՄՆ նախագահ Դոնալդ Թրամփը Հայաստանի անկախության առթիվ նախագահ Սերժ Սարգսյանին ուղղված իր շնորհավորական ուղերձում նշել էր․ «Մենք գնահատում ենք Հայաստանի ցուցաբերած աջակցությունը սիրիացի փախստականներին»: