Нохчийчуьра 104 шо долу йоккха стаг карийна Азербайджанехь
1914-чу шарера йолу Алиева Мадина Гедабекан кIоштарчу полисхошна карийна, гIора а йина урамехь. Цара медицинан гIо а кхачийна, йовха бедарш а елла, цул тIаьхьа «Təmiz Dünya» цIе йолчу юкъаралло доладечу гIо эшна нах дIатарбечу тIеоьцийле кхачийна.
Болчу хаамашца, паспорт тIерачу хенаца иза дуьненчу яьлла 1914-чу шарахь. Оьрсийчоьнан яхархо а ю иза, яхар Нохчийчохь ду, амма маьршша буьйцу цо азербайджанхойн мотт.
Цо дийцарехь, нана нохчо, да Iарбо хилла цуьнан. Меккахь йина ю иза. Цул тIаьхьа нанас Нохчийчу дIайигира ша аьлла, цигара депортаци а хьовсийра шаьш. Мадинин 15 шо дуьзча маре елла иза, доьзал бац цуьнан. ЦIийнда кхелхинчул тIаьхьа йохка-эцар лелийна цо, Азербайджанера Нохчийчу а оьхуш. Иштта Iамийна цо шена церан мотт а.
Алиевас бахарехь, ахча гулдина хилла цо Кербела зиярте яха. Новкъахь шина зудчо Iеха а йина, кхуьнгара 200 долларшкахь ахча а, дашо лергаухкурш а лачкъийна, Мадина Гедабеке а ялийна, охьатесна.
Карарчу хенахь Бакухь ю йоккха стаг. Лела хала а ду цунна, шегга юург а ца яало, амма хIетте а шен хIусаме, Нохчийчу юхаяха лаам бу цуьнан.
Гергарчу деношкахь Нохчийчу иза дIакхето тарло.