28 вагонаў з расейскімі ракетамі на шляху да мяжы з Украінай, Сальвадор падаўжае надзвычайнае становішча - 50 тысяч арыштаваных, швейцарцаў заклікаюць запасіць свечы, Японія сабралася заахвоціць моладзь піць алкаголь.
Artykuł Агляд СМІ: хай жыве сакэ! pochodzi z serwisu БЕЛАРУСКАЕ РАДЫЁ РАЦЫЯ.
28 вагонаў з расейскімі ракетамі на шляху да мяжы з Украінай, Сальвадор падаўжае надзвычайнае становішча – 50 тысяч арыштаваных, швейцарцаў заклікаюць запасіць свечы, Японія сабралася заахвоціць моладзь піць алкаголь, падрабязнасці ў аглядзе сусветных СМІ ад Антона Разумоўскага.
Упраўленне стратэгічных камунікацый Узброеных сіл Украіны паведамляе, што Расея канцэнтруе вялікую колькасць транспартна-пускавых кантэйнераў з зенітнымі кіраванымі ракетамі для ЗРК С-300 ля межаў з Украінай і на акупаваных ёю тэрыторыях; зараз да мяжы едзе эшалон з 28-і вагонаў з ракетамі з Улан-Удэ, паведамляе Украінская праўда. Яны прыбудць на мяжу з Украінай меркавана заўтра. Таксама паведамляецца, што Расея назапашвае ракеты для С-300 у беларускай Зябраўцы, што ў 22 км ад мяжы з Украінай – цяпер агульная колькасць транспартна-пускавых кантэйнераў перавышае там 60 адзінак. «Гэта відавочная пагроза масіраванага ўдару па тэрыторыі Украіны, прынамсі, ракетамі С-300. Улічваючы прыбыццё шэрагу эшалонаў да 20 жніўня, таксама відавочна, што яны канцэнтруюцца і рыхтуюцца на 24 жніўня ў Дзень незалежнасці Украіны», — заключылі ва Упраўленне стратэгічных камунікацый Узброеных сіл Украіны.
Урад Прэзідэнт Сальвадора Найіб Букеле папрасіў Кангрэс у аўторак зацвердзіць пятае падаўжэнне надзвычайнага становішча, каб працягнуць барацьбу з бандамі, у той жа дзень, калі група людзей патрабавала на вуліцах свабоды зняволеных сваякоў, паведамляе El Mundo. З канца сакавіка 50 000 чалавек знаходзяцца ў зняволенні за меркаваныя сувязі з крыміньлнымі групоўкамі. Кангрэс Сальвадора ўхваліў яшчэ адзін месяц падаўжэння надзвычайнага становішча, якое прыпыняе некаторыя фундаментальныя законы дзеля барацьбы з уплывовымі сіламі крымінальнай групоўкі. Ва ўмовах надзвычайнага становішча прыпыняюцца права на аб’яднанне, права на інфармаванне аб прычынах арышту і доступ да адваката. Урад таксама можа ўмешвацца ў званкі і пошту любога, каго яны лічаць падазраваным. Тэрмін арышту без прад’яўлення абвінавачанняў павялічваецца з трох да 15 сутак. Бягучы тэрмін павінен быў скончыцца 20 жніўня. Сваякі затрыманых кажуць, што людзей арыштоўваюць без доказаў і належнай судовай працэдуры і трымаюць у турмах ўжо некалькі месяцаў, пакуль яны чакаюць суда. Перад галасаваннем у Кангрэсе некалькі дзясяткаў пратэстоўцаў сабраліся каля заканадаўчага сходу, заклікаючы спыніць надзвычайнае становішча. Прэзідэнт Найіб Букеле запатрабаваў надзвычайных паўнамоцтваў пасля таго, як 26 сакавіка банды абвінавацілі ў 62 забойствах. Банды, у шэрагах якіх, паводле некаторых ацэнак, налічваецца каля 70 000 чалавек, доўгі час тэрарызавалі Сальвадор. Яны кантралявалі вучасткі тэрыторыі, вымагалі і забівалі беспакарана.
Гэтай зімой у Швейцарыі можа адбыцца адключэнне электрычнасці на некалькі гадзін, кажа Лаурыан Альтвег, віцэ-прэзідэнт Федэральнага ведамства энергетыкі, – пiша польскае выданне Rczeczpospolita. „Гэтай зімой мы павінны пераканацца, што ў нас дастаткова свечак і дроў для каміна”, – сказаў Альтвег швейцарскаму грамадскаму вяшчальніку RTS. Альтвег адзначыў, што адключэння электраэнергіі быць не павінна, але трэба быць да яго падрыхтаванымі. Бліжэйшай зімой у Швейцарыі можа не хапіць каля 3 ТВт-г электраэнергіі – гэта прыкладна 9 працэнтаў штогадовага спажывання энергіі ў гэтай краіне. Прычынай праблем з электразабеспячэннем у Швейцарыі можа стаць скарачэнне паставак з суседніх краін. Швейцарыя звычайна імпартуе каля 5 ТВт-гадз энергіі зімой. Аднак гэтай зімой імпарт энэрганосьбітаў можа быць меншым з-за скарачэння вытворчасці энергіі ў Францыі, дзе знаходзяцца ядзерныя рэактары, і скарачэння паставак газу з Расіі ў Германію, дзе 15% вытворчасці электрычнасці даводзіцца на спальванне газу. Зараз урад Швейцарыі заахвочвае жыхароў краіны эканоміць энергію – адмовіцца ад выкарыстання сушылак і электрычных пліт, выключыць непатрэбнае святло і выкарыстоўваць святлодыёдныя лямпы. Швейцарыя таксама разглядае магчымасць абмежавання або нават адключэння пад’ёмнікаў на альпійскіх курортах зімой.
Падатковыя ўлады Японіі аб’явілі конкурс Sake Viva! (Хай жыве сакэ!) сярод людзей ва ўзросце ад 20 да 39 гадоў, у рамках якога трэба прыдумаць варыянты, як заахвоціць моладзь да большага спажывання алкаголю, паведамляе Financial Times. Удзельнікам трэба прадставіць „новыя прадукты і дызайны”, а таксама спосабы, які б заахвочвалі піць спіртное дома. Конкурс аб’яўлены з-за скарачэння падатковых паступленняў ад алкагалёвай галіны з прычыны дэмаграфічных змяненняў, пандэміі і змянення ладу жыцця. Міністэрства аховы здароўя Японіі спадзяецца, што правядзенне конкурсу будзе „разумным” у частцы дапушчальнай колькасці алкаголю, якую можна ўжываць. Калі ў 2011 годзе на долю алкагалёвай прадукцыі прыпадала тры працэнты ўсіх падатковых паступленняў, то да 2020 года доля ўпала да двух. Сярэднегадавое спажыванне алкаголю дарослым чалавекам упала са 100 літраў у 1995 годзе да 75 літраў у 2020-м.
Беларускае Радыё Рацыя
Artykuł Агляд СМІ: хай жыве сакэ! pochodzi z serwisu БЕЛАРУСКАЕ РАДЫЁ РАЦЫЯ.