Пагроза траплення ўцекачоў з Блізкага Усходу ва Ўкраіну. Як вайна зменіць Еўропу? Саміт ЕЗ у Версалі: занадта расплывістыя рашэнні? Вайна ва Украіне: ці будзе толк ад новых перамоваў? Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
«Уцекачоў з Блізкага Усходу выштурхоўваюць з тэрыторыі Беларусі альбо ў Польшчу, альбо прапануюць трапіць ва Украіну. Праз дзесяць дзён пасля ўварвання Уладзіміра Пуціна ва Украіну, якое падтрымліваецца Беларуссю, імправізаваны лагер уцекачоў было загадана апустошыць», – піша брытанская газета The Guardian.
Выданне апісвае сітуацыю, калі дзесяткам шукальнікаў прытулку, якія месяцамі месціліся ў імправізаваным інтэрнаце ў Брузгах, вёсцы ў Беларусі менш чым за мілю ад польскай мяжы, 5 -га сакавіка група беларускіх жаўнераў загадала пакінуць будынак пад прыцэлам зброі і дала два варыянты: перасекчы мяжу з Польшчай, дзе ахоўнікі збілі іх, або ўехаць ва Украіну.
«Нягледзячы на прыбыццё ў Польшчу больш за мільёна ўцекачоў украінцаў, дабрачынныя арганізацыі, арыентаваныя на бежанцаў, у краіне не перастаюць падтрымліваць людзей, якія перасякалі польска-беларускую мяжу. Польская сетка няўрадавых арганізацый Grupa Granica, якія адсочваюць сітуацыю на мяжы, заявіла, што апошнім часам заўважыла павелічэнне колькасці асоб, якія шукаюць прытулку з Беларусі ў Польшчы, што пацвярджае сведчанні мігрантаў, якім загадалі пакінуць лагеры ў Беларусі», – піша брытанская газета і адзначае, што дабрачынныя арганізацыі асцерагаюцца, што асобы, якія шукаюць прытулку, зноў будуць выкарыстоўвацца ў якасці зброі, што адкрые новы крызіс на паўночна-ўсходняй мяжы Польшчы, які рызыкуе выклікаць беспрэцэдэнтны палітычны і матэрыяльна-тэхнічны хаос у краіне, якая змагаецца з масавай міграцыяй украінцаў, якія бягуць ад вайны.
«Таксама некаторыя з мігрантаў баяліся, што беларускія вайскоўцы прымусяць ваяваць разам з расейцамі супраць Украіны. Вядома, што Пуцін даў зялёнае святло на прыцягненне 16 000 добраахвотнікаў з Блізкага Усходу на дапамогу расейскай агрэсіі. Сірыйскія вайскоўцы пачалі набор вайскоўцаў са сваіх шэрагаў, каб ваяваць разам з расейскімі сіламі ва Украіне, абяцаючы выплаты ў памеры 3000 долараў у месяц — да 50 разоў больш, чым штомесяцовы заробак сірыйскага салдата», – адзначае The Guardian.
Вайна Расеі супраць Украіны пахіснула шматлікія канцэпцыі і ўяўленні, якія здаваліся непарушнымі, і прывяла да часам фундаментальнага пераасэнсавання базісаў, якія склаліся. Абаронныя бюджэты еўрапейскіх краін рэзка павялічваюцца, і краіны ЕЗ разам пастаўляюць узбраенне Кіеву. Аглядальнікі задаюцца пытаннем, якой будзе Еўропа, калі змоўкне зброя, і як ёй лепш падрыхтавацца да будучых часоў.
«Захад будзе змушаны ўзбройвацца», – лічыць італьянская газета Corriere della Sera.
«Пуцін не спыніцца, пакуль яму не ўдасца ўсталяваць у Кіеве марыянеткавы ўрад. Або пакуль Кітай не акажа на Пуціна ціск, і не прымусіць яго спыніцца да ажыццяўлення сваіх планаў. Як бы там ні было, калі пасля столькіх смерцяў і разбурэнняў нарэшце замоўкнуць гарматы, еўрапейскія ўрады павінны будуць растлумачыць грамадскасці, што баланс сіл у Еўропе змяніўся назаўжды. Урадам давядзецца ясна даць зразумець сваім выбаршчыкам, што нам усім неабходны моцны і надзейны сродак стрымлівання, калі мы не хочам, каб рана ці позна распачалася вайна», – адзначае італьянскае выданне.
ЕЗ мае намер выдзеліць дадатковыя 500 мільёнаў еўра на ўзбраенне і тэхніку для ўкраінскіх вайскоўцаў. Аднак у той жа самы час краіны-сябры супольнасці паменшылі надзеі Кіева на хуткае ўступленне ў ЕЗ. Еўрапейская прэса аналізуе прычыны прамаруджвання.
«Краіны ЕЗ прадэманстравалі згуртаванасць на саміце, аднак калі справа дойдзе да рэалізацыі ўзгодненых крокаў, цалкам могуць мець месца рознагалоссі і прамаруджванне», – піша бельгійская газета La Libre Belgique.
«У Версалі еўрапейскія лідэры заявілі аб сваёй падтрымцы «еўрапейскіх памкненняў» Украіны, але не хавалі сваіх рознагалоссяў наконт магчымага ўступлення краіны ў ЕЗ. Яны паабяцалі стаць незалежнымі ад расейскіх вуглевадародаў, але ледзь-ледзь здолелі дамовіцца аб тэрмінах адмовы ад іх, паколькі некаторыя з іх залежаць ад расейскіх паставак больш, чым іншыя. Калі перад супольнасцю паўстане неабходнасць прымаць самыя цяжкія рашэнні, ЕЗ будзе вымушаны праявіць згуртаванасць і рашучасць», – адзначае бельгійскае выданне.
У той час як украінскія гарады падвяргаюцца ўсё больш спусташальным авіяўдарам, дэлегацыі абедзвюх краін рыхтуюцца да чарговага раунда перамоваў, на гэты раз у рэжыме анлайн. Прэзідэнт Зяленскі выказаў надзею на тое, што гэтыя перамовы акажуцца падрыхтоўчым этапам сустрэчы з Пуціным. Еўрапейская прэса настроена вельмі скептычна.
На старонках партугальская газета Público піша пра тое, што прэзідэнт Украіны знаходзіцца ў вельмі складанай сітуацыі.
«Уладзімір Зяленскі стаіць перад неверагодна складанай палітычнай і чалавечай дылемай. Працяг абарончай барацьбы, падчас якой ён ужо стаў сапраўдным героем, на дадзены момант, судзячы па ўсім, уяўляе сабой адзіна магчымае выйсце. Але калі абарончая вайна супраць агрэсара зацягваецца надоўга, то на плечы кіраўніцтва кладзецца вялізная маральная і палітычная адказнасць. Пакуты людзей і матэрыяльныя разбурэнні ва Украіне будуць расці з кожным днём, наўрад ці забяспечваючы гарантыю перамогі, якая звяла б на нішто ўсе патрабаванні Расеі. Калі ж Украіна ў нейкі момант прызнае ўмовы Расеі, няхай нават у больш мяккай форме, то гэта ўсё роўна будзе багата палітычнымі саступкамі, якія былі для Украіны непрымальнымі да пачатку вайны. У канчатковым выніку ўсё гэта можа абярнуцца сур’ёзнымі ўнутрыпалітычнымі праблемамі», – адзначае партугальскае выданне.
Агляд сусветнай прэсы падрыхтавала Вольга Сямашка
