Праверка БелАЭС. Дзе карані тэрарызму? Эўтаназія не для ўсіх. Бывай, шпіёнскі раман! Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
Амерыканскае выданне Bloomberg у раздзеле «Палітыка» размясціла артыкул «У гэтым месяцы ЕЗ правядзе агляд бяспекі на АЭС у Беларусі»
Група аўтараў – Мільда Сэпутат, Брайн Паркін і Вольга Танас – ацанілі планы еўрачыноўнікаў наведаць Беларусь на гэтым тыдні, каб правесці запланаваны раней агляд бяспекі новай электрастанцыі.
Беларуская АЭС выклікала шматлікія крытычныя заўвагі з боку суседняй Літвы, якая ўваходзіць у склад 27-і сябраў ЕЗ. Аднак забудоўшчык станцыі – расейская кампанія Rosatom Corp., адхіляе любыя заявы Літвы па пытаннях бяспекі.
«Экспертыза на Астравецкай АЭС павінна быць завершана як мага хутчэй. На працягу ўсяго працэсу, які вядзе да ўводу ў эксплуатацыю, павінны быць забяспечаны самыя высокія стандарты бяспекі», – цытуе Bloomberg словы Камісара па энергетыцы ЭЗ Кадры Сімсан, якая акурат паходзіць з суседняй Эстоніі. Візіт на БелАЭС запланаваны на перыяд з 16-га па 18-е снежня.
На працягу праверкі будзе здзяйсняцца аналіз «колькасці і частаты інцыдэнтаў з бяспекай, што можа сведчыць аб дрэнным забеспячэнні і слабым кантролі якасці ў праекце, а таксама нізкай эксплуатацыйнай бяспецы» – піша выданне Bloomberg.
***
Французскі ўрад вынес на абмеркаванне парламента чарговы спрэчны законапраект, накіраваны, у першую чаргу, супраць радыкальнага ісламу. Згодна з законапраектам, права на хатняе навучанне дзяцей будзе абмежавана, імамы будуць абавязаны праходзіць навучанне ў Францыі, а фінансаванне рэлігійных аб’яднанняў з-за мяжы падвергнецца ўзмоцненаму кантролю. Акрамя таго, плануецца зрабіць больш жорсткім пакаранне за распальванне нянавісці і незаконную публікацыю персанальных дадзеных. Крытычна на такі крок глядзіць гішпанская газета El País, якая адказала артыкулам «Каштоўнасці Рэспублікі» і рэлігійная свабода».
Аўтар матэрыялу, палітолаг Олівер Рой звяртаеццца да французскага ўраду: «Ізноў міма мэты. Калі б падобныя меры былі прынятыя 20 гадоў таму – ці дапамагло б гэта прадухіліць тэракты? Адказ – не».
Пры гэтым газета El País звяртае ўвагу на біяграфіі тэрарыстаў, якія здзейснілі тэракты ў Францыі. Усе яны ў дзяцінстве наведвалі дзяржаўныя школы. Ніхто з іх не знаходзіўся на хатнім навучанні, ніхто не рос у палігамнай сям’і. «Таму звязваць тэрарызм з традыцыяй не выпадае» – падсумоўвае гішпанскае выданне.
***
Канстытуцыйны суд Аўстрыі прызнаў незаконнай забарону садзеяння пры сыходзе з жыцця для цяжкахворых людзей. Па меркаванні суда, такая забарона парушае права чалавека на самавызначэнне. Пры гэтым эўтаназія – забойства чалавека па ягонай просьбе – па-ранейшаму застаецца крымінальным учынкам.
На старонках аўстрыйскай газеты Der Standard на рашэнне суда адгукнулася журналістка Саскія Юнгнікль, вядомая сваёй кнігай пра самагубства ўласнага бацькі. У сваім артыкуле аўтарка вітае рашэнне суду і адзначае тое, што большасць людзей, якія свядома ідуць на самагубства, на самой справе не жадаюць паміраць.
«Калі б мой бацька змог пагаварыць са мной пра сваё жаданне сыйсці з жыцця, то я б адправілася з ім да ўрача. Калі б ён ізноў настойваў звесці рахункі з жыццём, то я засталася б з ім у апошнія хвіліны падчас дазволенай працэдуры суіцыду. Я б магла развітацца з ім, патрымаць яго за руку, мы акружылі б яго нашай любоўю і не дазволілі б сысці ў адзіноце і страху. Гэта быў бы больш годны канец» – прыводзіць словы журналісткі выданне Der Standard.
***
З нагоды смерці ў ангельскім горадзе Трура ў графстве Корнуэл знакамітага пісьменніка, аўтара шпіёнскіх раманаў Джона ле Кара, сусветныя СМІ разважаюць над тым, ці прывяло заканчэнне «халоднай вайны» да знікнення такога жанру, як «класічны шпіёнскі раман».
Чэшскі партал Echo24 размясціў каментар журналіста Мар’яна Кэхлібара, які адзначае, што Джон ле Кар у свой час быў супрацоўнікам спецслужбаў. Аднак прафесія шпіёна за гэтыя дзесяцігоддзі моцна змянілася. У эпоху ўсюдыісных відэакамер і аналізу ДНК усё складаней задзейнічаць агента пад фальшывым імем.
«Сёння інфармацыя здабываецца ў лічбавым выглядзе – за кошт узлому базаў дадзеных. Таму і аўтары пабодных раманаў будуць іншымі. Але гэта не значыцца, што слава класікаў жанру знікне бясследна: іх майстэрства назаўжды застанецца з намі» – падводзіць рысу эпохі шпіёнскага раману чэшскі партал.
Беларускае Радыё Рацыя
