Беларусь і Украіна могуць падаць агульную заяўку на правядзенне Алімпіяды
Урад Украіны пачаў рэалізацыю ініцыятывы прэзідэнта Уладзіміра Зяленскага аб супольным правядзенні з Беларуссю Алімпійскіх гульняў.
11 лютага на пасяджэнні аргкамітэта па падрыхтоўцы і ўдзеле спартсменаў Украіны ў Гульнях XXXII Алімпіяды і XVI Паралімпійскіх гульнях у Токіа прэм’ер-міністр Аляксей Ганчарук даручыў „вывучыць вопыт Беларусі ў правядзенні ІІ Еўрапейскіх гульняў і вопыт еўрапейскіх краін у правядзенні Алімпійскіх і Паралімпійскіх гульняў”, а таксама „распрацаваць выразны план у адпаведнасці з конкурснымі патрабаваннямі, устаноўленымі Міжнародным алімпійскім камітэтам”, паведаміла прэс-служба Кабінета міністраў.
„Гэта важны і адказны іміджавы крок. Такія маштабныя праекты спрыяюць інфраструктурнаму абнаўленню дзяржавы, росту турыстычнай прывабнасці і нацыянальнага прэстыжу ў свеце ў цэлым”, — заявіў Ганчарук.
Уладзімір Зяленскі агучыў сваю ідэю аб сумесным правядзенні Алімпійскіх гульняў у 2019 годзе. Аляксандр Лукашэнка ўспрыняў яе станоўча. „Думаю, нашы дзяржавы разам маглі б пазмагацца за права правядзення міжнародных спартыўных спаборніцтваў высокага ўзроўню. Гэта я кажу аб прапанове прэзідэнта Украіны, які прапаноўвае нам разам падумаць над тым, ці не замахнуцца нам на Алімпійскія гульні на дзве краіны і правесці. Гэта нам пад сілу”, — заявіў беларускі кіраўнік у кастрычніку мінулага года ў Жытоміры на Форуме рэгіёнаў Украіны і Беларусі.
На гэту ж тэму Лукашэнка выказваўся ў верасні 2019 года падчас паездкі ў Брэст. „Вядома, нам цяжка спаборнічаць з гігантамі (вялікімі краінамі), але, дапусцім, з украінцамі або расіянамі мы можам Алімпіяду правесці. Аб’екты пад Алімпійскія гульні ў нас гатовыя. Цяпер нацыянальны футбольны стадыён пабудуем і для водных відаў спорту, застанецца футбол. У Расіі ўся інфраструктура створана пад футбол. Можам з імі прыняць Алімпіяду. І тут у асноўным летнюю правесці — у Беларусі — з дапамогай расіян ці ўкраінцаў. У іх ёсць аб’екты, якіх нам не хапае”, — сказаў афіцыйны лідар.