Мітрапаліт Павел: Вострай неабходнасці ў вывучэнні беларускай мовы я не бачу

Мітрапаліт Павел не бачыць „вострай неабходнасці” ў вывучэнні беларускай мовы. Пра гэта патрыяршы экзарх усяе Беларусі заявіў  у інтэрв’ю, апублікаваным 25 ліпеня на афіцыйным сайце Маскоўскага патрыярхату.

„У Беларусі дзве дзяржаўныя мовы. І яны аднолькава выкарыстоўваюцца, як беларуская, так і руская. Усе адзін аднаго разумеюць, на рускай і на беларускай мовах, — заявіў ён. — Тут усё-такі сітуацыя адрозніваецца ад ЗША, дзе я служыў раней. У Злучаных Штатах я часам трапляў у такія прыходы, дзе ніхто не размаўляе па-руску. Таму я быў вымушаны размаўляць на англійскай мове. І служыць прыходзілася на англійскай, і прапаведаваць на англійскай. Такія складваліся абставіны. Калі ўзнікае жыццёвая неабходнасць, то прыходзіцца вывучаць мову. Але ў Беларусі, калі хтосьці размаўляе па-беларуску, я ўсё разумею, можа быць, за выключэннем некаторых слоў. І вось па гэтай прычыне я ўвесь час адкладаю вывучэнне мовы на потым, калі будзе ў мяне на гэты час, а часу ўсё няма і няма. Але саму ідэю — вывучыць мову — я не пакідаю”.

Пяць гадоў таму мітрапаліт Павел пасля прыезду ў Беларусь паабяцаў вывучыць беларускую мову. Аднак гэтае абяцанне кіраўнік Беларускай праваслаўнай царквы дагэтуль не выканаў.