Мінфін значна павялічыў аб’ёмы валютных запазычанняў на ўнутраным рынку
Міністэрства фінансаў Беларусі значна павялічыла аб’ёмы валютных запазычанняў на ўнутраным рынку ў адсутнасць сёмага траншу крэдыту ЕФСР і абяцанага крэдыту Расеі на рэфінансаванне доўгу.
Як вынікае з інфармацыі Мінфіна, з 1 студзеня па 31 мая 2019 года на ўнутраным фінансавым рынку рэалізавана дзяржаўных доўгатэрміновых аблігацый Рэспублікі Беларусь, намінаваных у замежнай валюце, на суму 420,7 млн долараў ЗША і 70,6 млн еўра.
Гэта больш за гадавы аб’ём, прадугледжаны законам аб рэспубліканскім бюджэце, якім запланавана размяшчэнне ў 2019 годзе на ўнутраным фінансавым рынку дзяржаблігацый на суму 370 млн долараў ЗША ў эквіваленце.
Валютныя запазычанні на ўнутраным рынку Мінфін прыцягвае для рэфінансавання плацяжоў па дзярждоўгу.
Згодна з параметрамі, якія прадугледжвае бюджэт, Беларусі ў 2019 годзе трэба накіраваць на пагашэнне і абслугоўванне дзяржаўнага доўгу каля 8,8 млрд рублёў. Для рэфінансавання плацяжоў па дзярждоўгу Мінфін раней планаваў на знешнім рынку заняць 1,5 млрд долараў, а на ўнутраным (шляхам размяшчэння валютных дзяржаблігацый) — 370 млн долараў.
За студзень—красавік ўлады накіравалі на пагашэнне знешняга дзярждоўгу 588 млн долараў ЗША. Пры гэтым знешні дзярждоўг на 1 мая склаў 16,7 млрд долараў, знізіўшыся з пачатку года на 200 млн долараў, або на 1,3%.
Варта адзначыць, што Беларусь чакае канчатковага рашэння Расіі аб выдзяленні крэдыту на 600 млн долараў для рэфінансавання існуючага перад РФ доўгу. „Мы ведаем, што ў бюджэце Расійскай Федэрацыі на гэты год названыя сродкі закладзены, застаецца рашэнне аб іх выдзяленні”, — заявіў журналістам 16 мая ў Мінску намеснік міністра фінансаў Андрэй Белкавец. Паводле яго слоў, расійскі бок пакуль не падаў беларускаму праект пагаднення па гэтым запазычанню.
Белкавец падкрэсліў, што ў якасці альтэрнатывы расійскаму крэдыту дзяржорганы разглядаюць магчымасць прыцягнення нязвязанага запазычання ў Кітаі на 500—600 млн долараў.
Між тым, тэрміны разгляду пытання аб выдзяленні Беларусі сёмага траншу крэдыту Еўразійскага фонду стабілізацыі і развіцця таксама зацягваюцца. У 2016—2018 гадах краіна атрымала шэсць траншаў крэдыту на 1,8 млрд долараў. Апошні, сёмы, транш (на 200 млн долараў) беларускія ўлады разлічвалі атрымаць у першым квартале 2019 года.