Сойм Руху Салідарнасці “Разам” прыняў шэраг заяваў

18 траўня адбылося чарговае паседжэнне Сойму Руху Салідарнасці “Разам”, якое прайшло на Сядзібе Партыі БНФ. У ім узялі ўдзел 40 чалавек.

Падчас паседжання разглядаліся пытанні ўдзелу ў Канферэнцыі “Беларуская інтэлігенцыя ў падтрымку Беларускай Аўтакефальнай Праваслаўнай Царквы”, якая мусіць адбыцца 17-18 жніўня 2019 г. у Чарнігаве, і пра сітуацыю ў Курапатах. Па першым пытанні даклады зрабілі Вячаслаў Сіўчык і Алена Талстая, па другім – Валянціна Вяргей і Аляксей Марачкін. У дыскусіі ўзялі ўдзел: Леанід Акаловіч, Сяргей Законнікаў, Генадзь Драздоў, Мечыслаў Бурак, Мікола Савіцкі, Алена Скам’янава, Ніна Багінская і іншыя.

Па трэцім пытанні, – “Гібрыдная агрэсія РФ: беларускі стратэгічны напрамак”, – з дакладамі выступілі Дзяніс Івашын і Ігар Лялькоў.

Сойм Руху Салідарнасці “Разам” па выніку пасяджэння прыняў рашэнне “Аб безумоўнай падтрымцы Канферэнцыі, якая адбудзецца 17-18 жніўня ў Чарнігаве”, заяву “Рукі прэч ад Курапатаў!”, зварот да Папы Рымскага, Патрыярхаў Канстанцінопальскага і Маскоўскага і ўсіх першаерархаў, епіскапаў і біскупаў хрысціянскіх Цэркваў “Абараніце Крыж!”

Таксама была прынятая Заява салідарнасці з журналістам і аналітыкам Дзянісам Івашыным. Напрыканцы пасяджэння Вячаслаў Сіўчык запрасіў усіх прысутных прыняць самы актыўны ўдзел у абароне Курапатаў і ў іншых мерапрыемствах Руху.

Паводле прэс-рэлізу Руху Салідарнасці “Разам”