Без яшь инспекторлар!
Безнең 2нче гимназия шәһәрнең машиналар күп йөри торган, берничә юл кисешкән урынына урнашкан. 36-37нче бистә белән 32нче комплекс арасында светофор куелмау һәм зебраның уңып беткән булуы тормышыбызга зур куркыныч тудыра. Шуңа күрә, бу хакта күпме генә сөйләшсәк тә, артык түгелдер. Гимназиядә, чыннан да, күп төрле чаралар оештырыла: ГИБДД хезмәткәрләре белән очрашулар, класс сәгатьләре, төрле рольле уеннар, викториналар һ.б. Юл-транспорт фаҗигаләрен кисәтү максатыннан, бу көннәрдә ОПНН отряды әгъзалары белән берлектә укучылар да юл чатларында махсус киемнәрдән патрульлек итәләр. Алар белән ЮХИДИ хезмәткәрләре алдан әзерлек-инструктаж үткәрә. Рейдларда катнашучылар арасында моңа кадәр юл кагыйдәләрен бозарга яраткан укучылар да булырга мөмкин. Алар өчен дә бер сабак бу.
Инспекторлардан ишеткән саннар да сагайтырлык. Агымдагы елның 8 ае эчендә шәһәребездә балалар катнашында 66 юл-транспорт кагыйдәләрен бозу очраклары теркәлгән. 70 укучы төрле дәрәҗәдәге җәрәхәтләр алган. Шуның 19ы без яши торган «Электротехниклар» полиция бүлегенә туры килә. Атнаның иң аварияле көне – чәршәмбе, бик күп аварияләр 18.00-21.00 сәгать аралыгында була икән. Сак булыйк!
Гимназиядә төрле чараларны оештыруга ярдәм иткән ЮХИДИ хезмәткәрләренә һәм безнең яраткан инспекторыбыз Рузил абый Заһидуллинга зур рәхмәтебезне әйтәбез.