Чын йолдызлар чыгыш ясарлык итеп бизәлгән сәхнәгә иң беренче булып 22 нче балалар бакчасы вәкилләре күтәрелде. Ева һәм аның әнисе Татьяна Ярковалар Карлсон турында җырлады. Карлсон костюмын кигән әнисеннән ак күбәләктәй киенгән Ева бер дә калышмады. Сәхнәгә чыгучылар арасында төрле парлар бар иде. Мәсәлән, апалы-сеңелле Кира һәм Снежана Чаплыгиналар, Анастасия һәм Маргарита Юшиналар, абыйлы-сеңелле Миша һәм Ангелина Николаевлар, апалы-энеле Вероника Харитонова белән Вячеслав Конюхов, Анна һәм Данил Дарьиннар. Әбиле-оныклы парлардан Саҗидә ханым һәм Камилла Зариповалар (“Йолдызчыклар” дуэты, 29 нчы балалар бакчасы), кара-каршы җырлап, татар телендә “Әбием” җырын, ә Нина Колесникова оныгы Степан белән (“Сандугачлар” дуэты, 35 нче балалар бакчасы) удмурт халык җыры “Ялыка”ны башкарды. Җырның исеме биергә чакыруны аңлата. Әбисе әйтүенә караганда, бу дәртле көйне оныгы үзе сайлаган. Конкурс барышында мари телен дә ишетергә мөмкин булды. Әниле-уллы Анастасия Олеговна һәм Андрей Бочкаревлар (“Шонанпыл”, ягъни “Салават күпере” дуэты, 29 балалар бакчасы) милли такмаклар җырлады. Әтиле-уллы пар берәү генә иде: 35 нче балалар бакчасына йөрүче Данияр Фазлыев әтисе Илназ белән (“Дуслык” дуэты) “Мин яратам сине, Татарстан!” җырын башкарды. Шулай итеп, 35 нче балалар бакчасыннан өч пар чыгыш ясады, һәм аларның барысын да тамашачылар озаклап алкышлады. Өченче пар “Җырлы гаилә” дуэты булды: Алсу Мөхәммәтҗанова әнисе Гөлназ белән “Әни кебек булам” җырын башкарды. 16 нчы балалар бакчасыннан да өч пар катнашты. 29, 28, 27 һәм 36 нчы балалар бакчалары икешәр пар әзерләгән.
Конкурсның яртысына якынлашканда, сәхнәгә өч “мушкетер” күтәрелде. Мыеклы әни елмаеп, залдагыларга:
– Без кагыйдәләрне бераз бозабыз, билгеле, дуэт түгел, трио булып чыктык. Нихәл итәсең, Портосның өйдә ялгызы каласы килмәде, – диде. Иң бәләкәй “мушкетер Портос”ка карап, рәхәтләнеп көлештеләр, чөнки ул үзе генә түгел иде: бәләкәй атына “атланган”! Әнә шулай 34 нче балалар бакчасыннан Асия Морозова 4 яшьлек кызы Агния һәм 2 яшьлек улы Тимофей белән, үзе гитарада уйнап, мушкетерлар җырын башкарды.
Жюрида районның мәктәпкәчә мәгариф бүлеге методисты Әлфинә Билалова, мәктәпкәчә мәгариф буенча баш белгеч Татьяна Исламова, методик берләшмәләр җитәкчесе Светлана Матвеева, 2 нче балалар музыка мәктәбе мөгаллимәсе Людмила Вәлитова, “Башак” мәдәният йорты директоры Анна Матвеева бар иде. Аларга җиңүчеләрне сайлау бик кыенга туры килгәндер, дип уйлыйм.
Жюри карары буенча әниле-кызлы Лилия һәм Айсель Шакировалар (17 нче балалар бакчасы “Шатлык” дуэты) һәм Анастасия Иванова туганының кызы Анастасия Мокшина белән (12 нче балалар бакчасы) беренче урынга чыкты.
Икенче урын Танайка балалар бакчасына йөрүче Софья Силкинага һәм аның исем анасы Вера Нурумовага; 31 нче балалар бакчасыннан Дарина Можгина һәм аның әнисе Светлана Зиннур кызына бирелде.
Өченче урында – әниле-кызлы Вера һәм Валерия Николаевалар (28 нче балалар бакчасы) һәм Наталья Иванова кызы Лина Терехина белән (16 нчы балалар бакчасы).
Конкурс конкурс инде. Күпме тырышлык, көч, хәзерлек таләп итә. Чыгыш алдыннан дулкынланулар күпме! Бер малайның әнисе, улының башыннан сыйпап торды, әллә үзен, әллә аны шулай тынычландырды. Кайберәүләрнең сәхнәдә үзләрен иркен тотулары искитәрлек иде. Мәсәлән, Данил Дарьин (6 нчы балалар бакчасы) тыныч кына башкаларның чыгышын карап утырды, сәхнәгә дә көн саен чыгыш ясаган кеше кебек менде. Апасы Анна белән (“Фантазерлар” дуэты) “Әгәр ышанмыйсың икән” җырын башкарды. Тавышы да бик матур.
– Сине кем шулай җырларга өйрәтте? – дип сорадым мин аннан.
– Бакчада, – булды җавап.
Үзенең уңганлыгына балалар бакчасын сәбәпче саный икән, димәк аңа анда бик яхшы. Җырларга да, биергә дә өйрәтәләр шул анда. Матур итеп шигырь сөйләргә дә. Теләгең генә булсын. Өйдә әти-әни дә баланың сәләтен үстерүгә игътибар бирсә, теләсә-кайсы конкурста катнашырга була.
Мәдинә МӨХӘММӘТҖАНОВА