Чигү чигә асыл җепләр белән
Зәй районы Сабантуенда парк буйлап тезелешеп утырган әлеге фотосурәттәге чигү осталарына кемнәр генә сокланмый узды икән?! Җете сары милли киемнәрдән кул эше тотып утырган кызлар башкала кунаклары игътибарын да үзенә җәлеп итте. Алар чигү үрнәкләре, җепләр, кызларның әлеге һөнәргә кемнән өйрәнүләре белән кызыксынды. Кызлар уртасында утырган Имәнлебаш авылы мәдәният йорты директоры Энҗе Әхмәтҗановага чигүгә хирыслык әнисе Миңлезәкиядән күчкән. Чигү осталыгы буыннан-буынга килә: Энҗенең кызы Ләйсән дә оста әлеге шөгыльгә. Әлеге кызлар арасында Имәнлебаштан чигү остасы Ләйсән белән Рәзилә Хәйруллина да бар. Калган кызлар - политехник колледж студентлары, алар бу һөнәргә осталыкка уку йортында өйрәнә икән. Энҗе Әхмәтҗанова мәдәният йорты каршында эшләп килүче “Җәүһәр” фольклор коллективын да җитәкли. Ансамбльгә альяпкычлар, кульяулыклар, тастымалларны, йолаларны күрсәткәндә түрләмә, мендәр тышларын да үзебез чигәбез, ди Энҗе ханым. Ансамбль әгъзалары кулы белән чигелгән эшләр күз явын алырлык. Бу эшләре белән алар “Ак калфак” татар хатын-кызларының иҗтимагый оешмасы, Бөтендөнья татар конгрессы Башкарма комитеты белән берлектә оештырган “Илемне саклаучыга вәгъдә бүләгем — чиккән кулъяулык” дип аталган бәйгедә дә катнашканнар. Җәүһәрлеләрнең милли төсләрне уңышлы сайлавы, югары дәрәҗәдәге осталык, яңалык, кызыклы идеяләр белән жюри игътибарыннан читтә калмаган.