Печән әзерләү тәмамланып килә. Эшләп тә күрсәткән әлмәтлеләр!
Район авыл хуҗалыгы һәм азык-төлек идарәсе мәгълүматларына караганда, бүген хезмәтчәннәр печән әзерләүнең финиш сызыгына чыккан.
Хәзерге вакытта 8,5 мең гектарда азык культуралары чабылган. Кышка чамаланган печәннең 97% ы әзерләнгән. Дөрес, сенаж салу бераз тоткарлана диләр – бүгенгә нибары 21% сусыл азык салынган.
Быел районда күпьеллык үлән культуралары мәйданы 10 мең гектар тәшкил итә. Безгә 7 мең тонна печән, 39 мең тонна сенаж һәм 45 мең тонна силос әзерлисе бар. Шул очракта гына без терлекне уңышлы кышлата алачакбыз, ди белгечләр.