Балык Бистәсе районында социаль хезмәткәрләрне хөрмәтләү тантанасы

Аны икенче төрле кешенең проблемасын беренчеләрдән кабул итеп, аны чишү юлларын табарга тыршучылар бәйрәме итеп тә атыйлар.

Шушы көннәрдә Балык Бистәсе халыкны социаль яклау бүлеге хезмәткәрләре дә бу бәйрәмне билгеләп үттеләр. Чарага Балык Бистәсе муниципаль районы башкарма кометиты җитәкчесе Рашат Хабибуллин килгән иде. “Биредә 99 процент хатын-кыз эшли. Хатын-кыз эшләгәни җирдә тәртип булыр, дигән бер галим. Һәм бу сүзләр чыннан да дөреслеккә туры килә. Үз эшегезне төгәл һәм җиренә җиткереп башкарасыз. Сезне һөнәри бәйрәмегез белән котлыйм”,-диде ул. Бәйрәмдә Корноухово картлар йорты директоры Рәмзия Сатдинова, “Акчарлак” приюты җитәкчесе Илгизәр Шакиров та катнашты. Хезмәттәшләрен бәйрәм белән котлады алар.

Туган баладан алып, олы кешеләрнең дә мәнфәгатен кайгыртучы алар, дисәк тә ялгыш булмас. Нинди төр сораулар белән генә килмиләр анда. Ветераннар, инвалидлар, күп балалы гаиләләр, авыр тормыш хәлендә калучылар алардан ярдәм һәм яклау көтә. Социаль хезмәткәрләре үз чиратында ярдәм итәргә, мәсьәләнең чишелешен табарга тырыша. “Иң авыр хезмәтләрнең берсе бу. Дүрт ел эшләү дәверендә нинди генә хәлләр белән очрашырга туры килмәде. Әмма без коллектив белән кулга-кул тотынып эшләдек, авырлыкларны бергә җиңдек. Киләчәктә дә дус-тату эшләргә насыйп булсын”,-диде халыкны социаль яклау бүлеге җитәкчесе Айгөл Вафина.

Алдынгы хезмәткәрләр Рушания Низамова, Зөлфия Нуретдинова, Илһамия Фаләхова, Мөршидә Миннеханова Хезмәт социаль яклау министрлыгының Рәхмәт хаты һәм Мактау грамоталары белән бүләкләнде. Шулай ук район башлыгының Рәхмәт хаты һәм Мактау грамоталарына ия булучыларны да котладылар. Бәйрәм кичәсе социаль хезмәткәрләргә багышланган гимнны бергәләп башкару белән тәмамланды.

Гөлназ Зарипова.