Зәйдә социаль хезмәткәрләрне хөрмәтләделәр
Бүген иң мәрхәмәтле хезмәт ияләре - Социаль хезмәткәрләр көне. Шул уңайдан Зәйдә халыкка социаль хезмәтләр күрсәтү үзәгенең тернәкләндерү бүлегендә тантаналы чара узды.
- Социаль хезмәткәрләр - ярдәмгә аеруча мохтаҗ категориягә керүчеләргә даими булышлык күрсәтүче, аларның борчуын да, шатлыгын да уртаклашучы кешеләр. 2015 елда районда яшәүче 28 мең кешегә социаль ярдәм күрсәтелгән, агымдагы елның 5 аенда 27934 кеше әлеге һөнәр ияләре ярдәменнән файлаланган. Илдә, республикада, районда социаль яклауга мохтаҗлар нәкъ менә сезнең аша дәүләт ярдәмен тоя. Без сезнең хезмәтегез өчен зур рәхмәтле, имин, сәламәт яшәгез, -дип мөрәҗәгать итте район башлыгы Разиф Кәримов һөнәри бәйрәмнәре белән тәбрикләп, әлеге һйнәр ияләрен.
Бүгенге көндә районда 115 социаль хезмәткәр исәпләнә. Алар өлкәннәрне дә, физик мөмкинлеге чикләнгәннәрне дә, балаларны да колачлый. Хәзерге вакытта район җирлегендә 44 Бөек ватан сугышы ветераны, сугышта катнашканнарның 215 тол хатынны, 944 тыл хезмәтчәнне, 3984 хезмәт ветеранны, 2965 инвалид яши. Район социаль яклау бүлеге башлыгы Эльмира Хуҗина бәйрәм котлавын үз исеменнән дә, әлеге тармак министры Эльмира Зарипова исеменнән дә җиткерде, әлеге категория кешеләрнең проблемаларын хәл итүдә, сөенечләрен уртаклашуда алыштыргысыз затлар булулары өчен рәхмәт белдерде.
Тантанада социаль хезмәткәрләр Светлана Максимова Хезмәт һәм социаль яклау министрлыгы Мактау грамотасы, Айгөл Волкова министрлыкның Рәхмәт хаты белән бүләкләнде. Бер төркем хезмәткәрләр район башлыгы, башкарма комитет җитәкчесенең Рәхмәт хатларына ия булды. “Энергетик” Мәдәният сарае үзешчеләре матур концерт күрсәтте.