Балагыз өйдәме – тикшереп торыргыз, юкса...
Бу һич кенә дә куркыту түгел, ә нибары кисәтү генә – 18 яше тулмаган балалар өлкәннәрдән башка урамда төне буе йөри алмый. Гамәлдә булган закон нигезендә, аларның урамда булу вакыты 22 сәгать белән чикләнә...
Узган елда Татарстанда административ җаваплылыкка 7800 яшүсмер, 38 меңнән артык ата-ана һәм урындагы затлар тартылган. Ведомствоара патронатта, 1815 гаилә тора. Аларда барлыгы 3236 бала тәрбияләнә. Республикакүләм мәгълүматлар буенча җәмгыятәне тетрәндерә торган мондый саннар да бар: узган елда 17 бала үз-үзенә кул салган, агымдагы елның биш аенда тагын 6 бала шул сәбәпле гүр иясе булган. Ел башыннан бүгенге көнгәчә 17 балигъ булмаган татарстанлы исерек көе тотылган. Бүген баланың кая, кем белән һәм ничек йөргәнен балалар бакчасыннан башлап мәктәпне бетереп чыкканга чаклы күзәтеп-белешеп торырга тырышалар. Әле күп аата-аналар белми торгандыр: мәктәп укучысы сәбәпсезгә дәрес каолдыра икән. бу хакта укытучы Әлмәт эчке эшләр бүлегенең балигъ булмаганнар белән эшләү бүлегенә хәбәр итәргә тиеш.
Тәртип сакчыларының һәрвакыт уяу тора. Шул исәптән төннәрен дә. Алдан әзерләнгән махсус рейдлар барышында 18 яше тулмаганнарның өлкәннәрдән башка урамда йөрүләрен, ни белән шөгыльләнгәннәрен ачыклыйлар. Шундый тикшерүләрнең берсендә – 25 майда узды. Аңарда район башлыгы урынбасары Наҗия Хәйдәрова, эчке эшләп идарәсенең балигъ булмаганнар белән эшләү инспекторлары, шәһәр оешмаларының кайбер белгечләре катнашты.
Шәһәрнең үзәк районнарында урнашкан ишегалларында, караңгы почмакларында (ни дисәң дә, караңгылык – яшьләрнең дусты), бер сүз белән әйткәндә, Әлмәт яшьләре җыела торган урыннарда булып, республикада куелган «комендат сәгатенең» үтәлешен тикшерделәр. Нәтиҗәдә берничә балигъ булмаган әлмәтленең әти-әниләренә инспекторлар белән күзгә-күз очрашырга туры киләчәк.