Зәйдә балаларны яклау көне зур чаралар белән билгеләп үтелә
Бүген - Халыкара балаларны яклау көне. Бөтен илдәге кебек, районда да ул киң колач белән билгеләп үтелә. Шәһәрнең төрле мәйданчыкларында, авыл җирлекләрендә бу уңайдан балалар өчен күптөрле чаралар оештырыла. Шәһәрдә иртән республика яшьләр эшләре һәм спорт министры урынбасары Алмаз Минголов катнашында өч заманча спорт мәйданчыгы ачылды, Икмәк кабул итү предприятиясе бистәсендә яңа яшьләр үзәге эшчәнлегенә старт бирелде. “Космос” яшьләр үзәгендә балалар өчен фильмнар күрсәтелә, Ринат Фәрдиев исемендәге паркта балалар бакчалары командалары арасында “Матурлык – хәрәкәттә, сәламәтлек - балачактан ук II дип исемләнгән спорт фестивале бара. Мирный, Иске Зәй бистәләрендә балалар өчен уеннары оештырыла. Ә “Энергетик” Мәдәният сарае иртәдән үк балалар уен мәйданчыгын хәтерләтә.