СІМ Түркияда қазақстандық қыздың қаза тапқанын растады
Қазақстанның Сыртқы істер министрлігі Ыстанбұлда қазақстандық қыздың қаза тапқанын растады, - деп хабарлайды Tengrinews.kz.
"Қазақстандық дипломаттар марқұмның туыстарымен байланыста болып, оларға консулдық-құқықтық көмек көрсетіп жатыр. Түркияның құзырлы органдары тергеу жүргізіп жатыр. Оқиғаның мән-жайы анықталып жатыр", – деді Сыртқы істер министрлігінің ресми өкілі Жанболат Үсенов.
Ол бұл мәселе Қазақстан Сыртқы істер министрлігінің бақылауында екенін атап өтті.
Бұған дейін Түркияның бұқаралық ақпарат құралдары 26 жастағы қазақстандық Айсұлу Бекмаханованың қаза тапқанын хабарлаған еді. Қайғылы оқиға 25 қазанда таңертең болған. Алдын ала мәлімет бойынша, бойжеткен алтыншы қабаттағы пәтердің балконына шығып, белгісіз жағдайда көрші үйдің төбесіне өткен.
Кейін қыз шатырдың орта тұсына қарай жүрген. Болжам бойынша, ол төменгі жағында бос кеңістік бар жерге орнатылған қалқаның үстіне басқан. Алайда құрылым оның салмағын көтере алмай, қазақстандық қыз ғимараттың жер астындағы екінші қабаты деңгейіне құлап кеткен. Бойжеткен алған жарақаттарынан оқиға орнында көз жұмған.