Қырғызстанда жер сілкінді: жерасты дүмпулері қай жерде сезілді?
Қырғызстан сейсмологтары елдің оңтүстігінде жер сілкінісін тіркеді, - деп хабарлайды Tengrinews.kz тілшісі 24.kg агенттігіне сілтеме жасап.
Басылымның мәліметінше, Ұлттық ғылым академиясының Сейсмология институты оқиғаның мән-жайын жариялады.
Жер асты дүмпулері 26 қазанға қараған түні жергілікті уақыт бойынша сағат 02:21-де (Қазақстан уақытымен 01:21-де) тіркелді, оның қарқындылығы шамамен 3 балл болды. Жер сілкінісінің ошағы Қырғызстан аумағында орналасқан: Ничке ауылынан оңтүстік-шығысқа қарай 15 шақырым, Қызыл-Өзгөрүш ауылынан шығысқа қарай 18 шақырым және Токтогул аудан орталығынан оңтүстік-шығысқа қарай 62 шақырым жерде болды.
Қызыл-Өзгөрүш, Ничке, Сары-Бұлақ ауылдарында жер сілкінісінің күші шамамен 2 балл болды.
Бұған дейін Қырғызстанның оңтүстігінде сенбі, 24 қазанда жергілікті уақыт бойынша сағат 19:20-да (Қазақстан уақытымен 18:20-да) жер асты дүмпулері тіркелген болатын. Жер сілкінісінің ошағы ел аумағында: Жылғын ауылынан солтүстікке қарай үш шақырым, Аркит ауылынан оңтүстікке қарай алты шақырым және Кербен қаласынан солтүстік-шығысқа қарай 35 шақырым жерде орналасты.
Аркит, Чат, Жол-Сай, Жылғын ауылдарында жер сілкінісінің қарқындылығы 2,5 балл болды.