Ешбір мессенджер толық қауіпсіз емес: полиция қазақстандықтарға үндеу жасады
Солтүстік Қазақстан облысында балалар байқауына қатысушыларға дауыс беру сілтемелерін пайдалану арқылы жасалған 14 алаяқтық дерегі тіркелді. Қаскөйлер мұндай хабарламаларды таныс адамдардың атынан жіберіп, кейін өзгелердің аккаунтына қол жеткізеді және иесінің контактілерінен ақша сұрайды, деп хабарлайды Tengrinews.kz тілшісі Polisia.kz сайтына сілтеме жасап.
Алаяқтардың жаңа схемасы қалай жұмыс істейді?
Хабарламалар зиянсыз болып көрінуі мүмкін. Мысалы, адамға бала үшін дауыс беру немесе байқауға қатысушыны қолдау ұсынылады. Хабарламаға сілтеме қоса беріледі, оған өткен жағдайда мессенджердегі аккаунт бұзылуы мүмкін.
Жазысқан хаттарға қол жеткізген алаяқтар аккаунт иесінің контактілеріне жазып, шұғыл түрде ақша қарызға сұрайды. Мысалы, олар кешке қайтаруға уәде беріп, 80 мың теңге аударуды өтінуі мүмкін.
Бұл ретте аккаунттың нақты иесі оған кіре алмай қалуы мүмкін және оның атынан таныстарына хат жазылып жатқанынан мүлдем бейхабар болады.
Полиция сілтемелердің қаупін ескертті
Полиция мұндай схема кез келген мессенджер пайдаланушыларына қатысты болуы мүмкін екенін атап өтті. Киберқылмысқа қарсы іс-қимыл басқармасының мәліметінше, СҚО-да осындай схема бойынша 14 алаяқтық дерегі тіркелген.
"Кез келген азамат осындай қауіпке ұшырауы мүмкін. Оның ішінде кеңінен қолданылатын WhatsApp та бар. Адамға қаншалықты сенсеңіз де, ол сілтеме жіберсе, әдеттегі телефон қоңырауы арқылы хабарласып, мұндай хабарламаны шынымен өзі жіберген-жібермегенін анықтаңыз", - деп ескертті Солтүстік Қазақстан облысы полиция департаменті бастығының бірінші орынбасары Әлібек Қожахметов.
Сондай-ақ полицейлер танысыңыз "Қарашы, мына фотодағы сен емессің бе?" деген сұрақпен фотосурет сияқты сілтеме жіберсе де, оны ашпауға шақырды. Мұндай сілтемелер зиянды бағдарламалық жасақтамасы бар ресурстарға алып келуі мүмкін.
Бұған дейін Ұлттық банк алаяқтықтың жаңа схемасы туралы ескертті. Қаскөйлер қазақстандықтарды олардың атына несие рәсімделді және цифрлық сенімхаттар берілді деп қорқытады, кейін ақшаны қорғау сылтауымен құпия деректерді алуға немесе қаражатты "қауіпсіз шоттарға" аударуға көндіруге тырысады.