Жамбыл облысында әскерилерге арналған үйлер бес жыл бойы бос тұрған: Қорғаныс министрлігі не дейді?
Әлеуметтік желілерде Жамбыл облысы Гвардейский кентіндегі әскери қызметшілерге арналған екі бірдей 120 пәтерлі үйге қатысты жағдай талқыланып жатыр. Жазба авторлары әскерилер баспанаға зәру болса да, бұл ғимараттардың бірнеше жылдан бері бос тұрғанын алға тартады. Қорғаныс министрлігі үйлердің құрылысы неге аяқталмағанын түсіндірді, деп хабарлайды Tengrinews.kz тілшісі.
Әскерилерге арналған үйлердің бос тұрғанына бес жыл болды
Әлеуметтік желілерде Жамбыл облысы Гвардейский кентіндегі екі көппәтерлі үй туралы ақпарат тарады. Авторлардың айтуынша, әскерилердің үйге деген мұқтаждығына қарамастан, бұл нысандардың пайдаланылмай тұрғанына бірнеше жыл болған.
Жарияланымдарда құрылысқа бөлінген қаражаттың жұмсалу мәселесі де көтерілген.
"Әскери қызметшілер Жамбыл облысы Гвардейский кентінде халықтың ақшасына әрқайсысы 120 пәтерлі екі үй салынғанын айтады. Алайда белгісіз себептермен бұл үйлер бес жылдан бері қаңырап бос тұр, ал әскерилер кезекте тұрып, көптен күткен баспаналарына қол жеткізе алмай жүр", - делінген жазбада.
Редакция екі үйдің құрылысы қай кезеңде екенін және олардың осы уақытқа дейін неге пайдалануға берілмей отырғанын анықтау үшін Қазақстан Қорғаныс министрлігіне сауал жолдады.
Конструкциялардан жарықтар табылды
Қорғаныс министрлігі сауалға берген жауабында жобаны іске асыру барысында құрылыс салушылар тарапынан құрылыс нормалары талаптарына сәйкессіздіктер мен конструкциялық элементтердің кемшіліктері анықталғанын хабарлады.
"2021 жылы тұрғын үйлердің дайындық деңгейі 90 пайызды құрады. Сонымен қатар құрылыс салушылар тарапынан жүк көтергіш конструкцияларда жарықтардың анықталуына байланысты жұмыстарды одан әрі жүргізу тоқтатылды. Кейіннен бірқатар техникалық тексерулер жүргізіліп, олардың нәтижесі бойынша анықталған кемшіліктерді жою үшін қажетті іс-шаралар айқындалды", - деп хабарлады Қорғаныс министрлігі.
Ведомство мәліметінше, 2026 жылдың шілдесінде уәкілетті қызметтер нысандарға қосымша тексеру жүргізген.
"Оның нәтижелері бойынша конструкцияларды нығайту және тиісті жобалық құжаттаманы әзірлеу ұсынылды", - деп нақтылады ведомство өкілдері.
Қазіргі уақытта мемлекеттік органдармен және сараптамалық ұйымдармен бірлесіп техникалық шешімдерді айқындау, жобалық құжаттаманы түзету және құрылысты аяқтау мүмкіндігін қамтамасыз ету бойынша жұмыстар жүргізіледі.
Бұл ретте Қорғаныс министрлігінің жауабында жұмыстарды аяқтау мен үйлерді пайдалануға берудің нақты мерзімдері көрсетілмеген.
Қорғаныс министрлігі бұл ақпараттың қорғалған сипатына және жария етуге жатпайтынына сілтеме жасап, үйлердің құрылысына жұмсалған қаражат сомасын атамады.
Сондай-ақ ведомство Гвардейский гарнизонында тұрғын үйге мұқтаж ретінде есепте тұрған әскери қызметшілерге үлестіру үшін бос қызметтік пәтерлердің жеткілікті екенін мәлімдеді.
Еске сала кетейік, бұған дейін ҚР Жоғары аудиторлық палатасы Қазақстан Қорғаныс министрлігіне мемлекеттік аудит жүргізуді бастаған болатын. Тексеру "бюджет қаражатын пайдаланудың тиімділігіне, сондай-ақ әскери бөлімшелерді материалдық-техникалық қамтамасыз ету мәселелеріне" қатысты жүргізіліп жатыр.