БАӘ іздеуде жүрген үш адамды Қазақстанға берді: олар не үшін күдікке ілінген?
Біріккен Араб Әмірліктері халықаралық іздеуде жүрген үш азаматты Қазақстанға экстрадициялады. Олар алаяқтық, тонау, бұзақылық және басқа да қылмыстар жасады деген күдікке ілінген, - деп хабарлайды Tengrinews.kz тілшісі Бас прокуратураның баспасөз қызметіне сілтеме жасап.
Ресми мәліметтерге сәйкес, экстрадицияланғандардың бірі алаяқтық жасады деген күдікке ілінген. Ол 2019–2020 жылдары сыбайласымен бірге жәбірленушіге Астанада халықаралық орталық салу үшін жер телімін алуға көмектесуге уәде берген. Осылайша, олар оның жалпы сомасы 368 мың доллар қаржыны иемденген.
Тағы бір айыпталушыға денсаулыққа қасақана ауыр зиян келтіру, тонау және бұзақылық жасады деген күдікпен іздеу жарияланған. Тергеу мәліметтері бойынша, ол 2021 жылы Алматыда сыбайластарымен бірге бір адамға шабуыл жасап, денсаулығына ауыр зиян келтірген және 100 мың теңгеден аса сомаға жеке мүлкін жымқырған.
Үшінші күдікті, тергеу нұсқасы бойынша, биыл жазда Астанада Қытай азаматының 24 200 долларын ұрлап кеткен. Бұл сома аса ірі мөлшерге жатады.
Болжамды қылмыстарды жасағаннан кейін, үшеуі де қылмыстық қудалау органдарынан бой тасалап, оларға халықаралық іздеу жарияланды. Кейінірек олар БАӘ аумағында анықталды.
Қазақстан Бас прокуратурасының сұрауы бойынша күдіктілер отанына экстрадицияланды. Қазіргі уақытта олардың барлығы тергеу изоляторына қамалды, сотқа дейінгі тергеу амалдары қайта басталды.
Бас прокуратура экстрадициялау қазақстандық делегацияның БАӘ-ге сапары кезінде қол жеткізілген келісімдердің нәтижесі екенін атап өтті.
Бұған дейін Бас прокурордың орынбасары Асхат Жұмағали бастаған Қазақстан Бас прокуратурасының делегациясы БАӘ-де өткен БҰҰ-ның Қылмыстың алдын алу және қылмыстық сот төрелігі жөніндегі 15-ші Конгресіне қатысқан болатын. Сапар аясында БАӘ Әділет министрімен және Бас прокурорымен кездесулер өтіп, онда қылмыспен күресудегі ынтымақтастық және іздеудегі адамдарды экстрадициялау мәселелері талқыланды.
Тағы оқыңыз: Бес жыл бойы жасырынған қазақстандық Астанаға экстрадицияланды