Астанада қар жауды: жылы күндер қашан оралады?

6 қазан күні таңертең Астанада қар жауды. Оған дейін елордада жаңбыр жауған болатын, деп хабарлайды Tengrinews.kz тілшісі.
Таңғы уақытта жауынның соңы қарға ұласты. Температураның плюстік көрсеткішіне қарамастан, қалада ұлпа қар жауып тұр: ауа температурасы шамамен 3 градус жылы болғанымен, сезілуі минус 5 градустай.

Ауа райы алдағы уақытта қандай болады?
"Қазгидрометтің" соңғы болжамына сәйкес, 6 қазанда Астанада жаңбыр мен қар жауады деп күтіледі. Температура түнде және күндіз +1-ден +3 градусқа дейін болады. Түнде және таңертең оңтүстік-батыс желінің екпіні секундына 23–28 метрге дейін жетуі мүмкін.
7 қазаннан бастап жауын-шашын тоқтайды, бірақ жолдарда көктайғақ болады деп болжанады. Түнде температура −1…−3 градусқа дейін төмендеп, күндіз +8…+10 градусқа дейін жылынады. 8 қазанда синоптиктер тағы да жаңбыр жауады және күндіз +9…+11 градусқа дейін жылы болады деп болжап отыр.
Қазан айының басындағы күннің күрт суытуы мен қар жайлы синоптиктердің он күндік алдын ала болжамда да айтылған болатын. Суық кезеңнен кейін елордаға қайтадан жылымық келеді: 9 және 10 қазанда температура +15…+17 градусқа дейін көтерілуі мүмкін.