Талғар тұрғынының өлімі: үш ер адам сот алдына келді

Алматы облысының Қаскелең қаласында Талғар ауданының 24 жастағы тұрғыны Жанасыл Сәрсенбайдың өліміне қатысты сот талқылауы басталды. Процесс ашық режимде өтіп жатыр, деп хабарлайды Tengrinews.kz КТК арнасына сілтеме жасап.
Тергеу нұсқасы бойынша, күдіктілердің бірі жігітке пышақ жарақатын салған, ол ауруханада қайтыс болды.
Сот процесінің алғашқы минуттарынан бастап сотталушылар бет-жүздерін көрсетуге тыйым салды. Күдіктілер - 19 және 20 жастағы үш жас жігіт. Алайда олардың тек біреуі кісі өлтіргені үшін сотталып жатыр. Қалған екеуі қылмысты жасыру дерегі бойынша айыпталған.

"Жүргізуші бізге сигнал бере бастады. Елхан оған айналып өтуді ишарамен көрсетті. Жанасыл Елханға бірдеңе айтты, балағаттаған сияқты болды да, жанымыздан жылдамдықпен өтіп кетті. Біз олардың соңынан ердік. Үйдің жанына келгенде Елхан жалғыз өзі шықты. Ол Жанасылды пышақпен ұрды. Содан кейін маған "газды бас" деді. Пышақты көргенде мен есеңгіреп қалдым", - деді сотталушылардың бірі.

Жантүршігерлік қылмыс мамыр айында болған. Марқұмның туыстарының айтуынша, Сәрсенбай інісімен бірге әкесінің зиратына барып қайтқан. Жігіттер үйге қайтып келе жатқанда, жолын көлік мінген жастар бөгеген. Сәрсенбай ауылдастарына жол беруін сұрап белгі берген. Бірақ олар көлігін алмаған. Сол кезде ол оларды жоғары жылдамдықпен айналып өтуді ұйғарған. Болжам бойынша, бұл ағайындыларды үйіне дейін аңдып барған күдіктілердің ашуын туғызған.

"Біз үш адамның шығып келе жатқанын көрдік. Мен жолаушылар отыратын жақта тұрдым. Ешқандай әңгіме болған жоқ. Кенеттен Елхан ағамды екі пышақпен ұрды: алдымен оң қолымен, содан кейін сол қолымен", - деді марқұмның ағасы Еркебұлан Сәрсенбай.

Жанасыл Сәрсенбай ауруханада көз жұмды. Сотта оның анасы Алмагүл Нұрғизат күдіктілерге ең ауыр жаза қолдануды талап етті.

"Ұлым "Анашым, ағамды пышақтап кетті" деп жүгіріп келді. Мен далаға атып шықтым. Жанасыл тізерлеп отыр екен. Мен оны құшақтадым. Жедел жәрдем шақырдық. Сосын ауруханаға өзіміз жеткізуді ұйғардық. Кейін дәрігерлер маған "Ұлыңыз қайтыс болды" деді. Кешірмеймін. Мұндайды кешіру мүмкін емес. Осы үшеуі жасаған қылмысы үшін жазасын алсын. Өмірінің соңына дейін түрмеде отырсын", - деді әйел.

Жәбірленуші тарап сотталушылардан 100 миллион теңге көлемінде өтемақы өндіруді талап етті. Іс екі бап бойынша тергеліп жатыр: "Кісі өлтіру" және "Қылмысты жасыру". Бұл баптар бойынша сотталушыларға алты жылдан 15 жылға дейін бас бостандығынан айыру жазасы қаупі төніп тұр.

Тағы оқыңыз: “Қоршап алып, қорғануға мүмкіндік бермеді“: Талғар ауданында 20 жастағы жігітті өлтіріп кеткен