Экс-депутат Базарбек көлікпен қағып кетті деген зардап шегуші әлі де ауыр жағдайда жатыр
Биыл тамызда жол апатына себепкер болған көлік тізгінінде экс-депутат Бақытжан Базарбектің болғаны хабарланған еді.
Ресми мәліметтерге сәйкес, ЖКО-дан зардап шеккен 37 жастағы ер адам 15 тамызда ауруханаға түскен. Сол кезде ол анестезиология, реанимация және қарқынды терапия бөлімшесіне жатқызылды.
Бүгін жарақат алған сәттен бастап 23-тәулік өтті. Зардап шегуші қазір анестезиология, реанимация және қарқынды терапия бөлімшесінде жатыр.
"Пациенттің жалпы жағдайы политравма салдарынан ауыр күйде қалып отыр. Сонымен қатар, жүргізіліп жатқан қарқынды терапия аясында оң динамика байқалады. Дәрігерлер емдеуді толық көлемде жалғастырып, пациенттің жағдайын бақылауда ұстап отыр", - деп хабарлады Жамбыл облыстық денсаулық сақтау басқармасының баспасөз қызметі.
Айта кетейік, 16 тамызда Telegram-арналардың бірінде Жамбыл облысы Рысқұлов ауданы аумағында жол-көлік оқиғасы болғаны туралы жазба жарияланды. Ұсынылған ақпаратқа сәйкес, "Батыс Еуропа - Батыс Қытай" тасжолында жаяу жүргіншіні қағып кеткен. Көлік тізгінінде Мәжілістің экс-депутаты Бақытжан Базарбек болғандығы айтылды.
17 тамызда Бақытжан Базарбек әлеуметтік желідегі парақшасында сотқа дейінгі тергеу аясында өзі мен жұбайы ақпаратты жария етпеу туралы құжатқа қол қойғанын жазды.
Әлеуметтік желілердегі болжамдар мен пікірлерге түсініктеме бере отырып, Базарбек асығыс қорытынды жасамауды, тек ресми ақпарат пен тергеу нәтижелеріне сенуді сұрады.
Еске сала кетейік, жол-көлік оқиғасы дерегі бойынша сотқа дейінгі тергеу басталған болатын.
Бұған дейін жол апатынан зардап шеккен ер адамның туыстары бейнеүндеу жариялаған еді.
Instagram-дағы бұл жарияланымды көру
Бақытжан Базарбектің жарияланымы (@bakytzhan.bazarbek)