Тоқаев Құрылтай сайлауының сәтті өтуіне байланысты құттықтаған бес елдің басшыларына алғыс білдірді
Қасым-Жомарт Тоқаев шет мемлекеттердің басшыларына алғыс айтты, - деп хабарлайды Tengrinews.kz тілшісі Ақордаға сілтеме жасап.
Президент Қасым-Жомарт Тоқаев Тәуелсіз Қазақстан тарихындағы алғашқы бір палаталы Құрылтай сайлауының сәтті өтуіне байланысты жылы лебіздерін жолдаған Ресей Президенті Владимир Путинге, Қырғызстан Президенті Садыр Жапаровқа, Әзербайжан Президенті Ильхам Әлиевке, Өзбекстан Президенті Шавкат Мирзиёевке, Тәжікстан Президенті Эмомали Рахмонға ризашылығын жеткізді.
Мемлекет басшысы бұл парламент сайлауы Қазақстан азаматтарының ынтымағын байқатып, халқымыздың, әсіресе, өскелең ұрпақтың жарқын келешегі үшін жоғары деңгейде жауапкершілік танытқанын, нағыз отаншылдық үлгісін паш еткенін атап өтті.
Қасым-Жомарт Тоқаевтың пікірінше, Қазақстанның жан-жақты жаңғыруы, саяси және экономикалық реформалар үздіксіз жүргізілетін үрдіске айналды. Құрылтай сайлауының қорытындысы көрсеткендей, еліміздің бағыт-бағдарын азаматтардың басым бөлігі қолдайды. Бұл Әділетті, Озық, Таза Қазақстан құру жөніндегі жоспарды ойдағыдай орындауға сенімді кепіл болады.
Президент Қасым-Жомарт Тоқаев достас мемлекеттер басшыларының өз елдерін орнықты дамытуға бағытталған жобалары мен бағдарламаларын табысты жүзеге асыруына тілектестік білдірді.
Сондай-ақ Мемлекет басшысының атына ШЫҰ, ТМД, ҰҚШҰ, ЕАЭК, ЭЫҰ, ТҮРКСОЙ және басқа да халықаралық ұйымдар жетекшілерінің құттықтаулары келіп түсті.
Еске салайық: Құрылтай депутаттарының сайлауы жексенбі, 23 тамызда сағат 7:00-ден 20:00-ге дейін өтті. Орталық сайлау комиссиясы мәліметінше, сағат 20:00-дегі алдын ала қатысу көрсеткіші 74,19 пайыз болды. Барлығы 9 352 151 адам дауыс берді.
Бұған дейін экзитпол нәтижелері жарияланған болатын.
Сайлау қорытындысы қашан жарияланады?
Елімізде сайлау учаскелері жабылғаннан кейін бірден дауыстарды санау басталды. Содан кейін аумақтық комиссиялар ОСК-ға нәтижелер бойынша есеп береді. Орталық сайлау комиссиясы қорытындыны арнайы отырыста шығарады.
Соңғы қорытындылар 30 тамызға дейін белгілі болады.
Бұған дейін біз Құрылтай сайлауында кімдердің бірінші болып дауыс бергені туралы жазған болатынбыз. Токиода бір студент дауыс беруге қазақ биінің киімін киіп келді.