“72 рет пышақтаймын”: Нұрайдың ісіне қатысты пікір жазған шымкенттікке айыппұл салынды
Шымкенттің 37 жастағы тұрғыны Нұрай Серікбайдың өліміне қатысты жазбаның астына қалдырған пікірі үшін айыппұл арқалады, - деп хабарлайды Tengrinews.kz.
"72 рет пышақтар едім"
Пікір туралы марқұмның ағасы Сұлтан Серікбай айтып берді. Оның сөзінше, отбасы TikTok желісінде Нұрайдың атына балағат ретінде қабылданған хабарламаны байқап қалған.
"Таңертең біз жазба жарияладық. TikTok-та бізге шамамен мынадай мазмұндағы пікір қалдырды: "72 рет пышақтаймын Нұрайды деген сияқты". Он сағаттың ішінде полиция қызметкерлері оны жазған адамды тауып алды", – деді қыздың ағасы Instagram-да.
"Нұрай туралы айтқан жоқпын": пікір авторының түсіндірмесі
Шымкенттің 37 жастағы тұрғыны Нұрайды емес, қылмыскерді меңзегенін алға тартады.
"Иә, мен пікір жазған болатынмын: "72 рет пышақтаймын" деп. Бірақ мен ол жерде Нұрай туралы жазбағанмын. Ол жерде маған сұрақ қойылған "Егер қыз баласын 36 рет пышақтап кетсе, сен не істер едің" деп. Мен сол жерде жаңағы қылмыскерді 72 рет пышақтар едім деп меңзеп жазған едім. Нұрайдың отбасына сөздерім ауыр тиген болса, кешірім сұраймын. Бірақ жаңағыдай арам ойым болған емес", – деді ер адам видеода.
Сондай-ақ ол әлеуметтік желі қолданушыларын мұндай пікірлер жазбауға шақырды.
Ер адамға қанша айыппұл салынды?
Кешірім сұрағанына қарамастан, Шымкент Полиция департаменті пікір авторына 20 АЕК (2026 жылға 86 500 теңге) көлемінде айыппұл салынғанын хабарлады.
"Аталған дерек бойынша полиция қызметкерлері қаланың 37 жастағы тұрғынын анықтады. Ол 456-2-баптың 3-1-бөлігі, атап айтқанда, заңсыз контентті орналастырғаны және таратқаны үшін әкімшілік жауапкершілікке тартылды", – деп хабарлады полициядағылар.
Ер адаммен профилактикалық әңгіме де жүргізіліп, заңды сақтау қажеттілігі туралы ескертілді.
Анықтама: 456-2-баптың 3-1-бөлігі "Заңсыз контентті орналастыру, тарату, егер бұл әрекеттерде қылмыстық жазаланатын іс-әрекет белгілері болмаса" бойынша 20 АЕК (2026 жылға 86 500 теңге) мөлшерінде айыппұл қарастырылған.