Дастан Сәтпаев “Челсидегі“ алғашқы марапатын алды
Футболдан Қазақстан құрамасының вингері Дастан Сәтпаевтың голы Аустралияда өткен Sydney Super Cup 2026 турнирінің үздігі деп танылды, деп хабарлайды Tengri Sport League A баспасөз қызметіне сілтеме жасап.
Аустралия лигасы "Челси" қатысқан жолдастық турнир аясында соғылған алты үздік голды таңдап алды. Оған турнирдің ашылуы әрі Сәтпаевтың ағылшын клубы жейдесіндегі дебюті болған "Челси" - "Вестерн Сидней" матчінен бірден бес гол енді.
Дегенмен, рейтингте Сәтпаевтың алтыншы минутта соққан голы бірінші орынға ие болды.
Еске сала кетейік, Қазақстаннан келген 17 жастағы вингер допты аустралиялық команданың алаңында қабылдап, жылдамдықпен айып алаңына басып кірді де, қақпаның жоғарғы бұрышына жойқын соққы бағыттады.
Жас шабуылшының мұндай сенімділігі "Челси" жанкүйерлерін тәнті етті, олар әлеуметтік желілерде Сәтпаевқа көптеген жылы лебізін білдірді.
Айта кетейік, бүгін "Челси" Гонконгта италиялық "Ювентусқа" қарсы кезекті жолдастық кездесуін өткізеді.
6 минуттағы гол және жанкүйерлердің қошеметі: Сәтпаевтың "Челсидегі" дебюті қалай өтті?
Бұған дейін Дастан Сәтпаев "Челси" сапында екінші матчте алаңға шықты, алайда "Тоттенхэмге" қарсы ойында нәтижелі іс-қимылдарымен көзге түсе алмады.
Ал "Челси" сапындағы дебютінен кейін ол әлеуметтік желілердегі ең танымал қазақстандық футболшыға айналды.