Испанияға шекарада көмек көрсету және Марокконы қолдау: ЕО мигранттар дағдарысын шешу жолын ұсынды

Сеутадағы мигранттар ағынынан кейін Еуропалық комиссия басшысы Урсула фон дер Ляйен ЕО-ның сыртқы шекараларын нығайту үшін "бірлескен іс-қимылдарға" шақырды. ЕК басшысы Испания премьер-министрі Педро Санческе жазған хатында бақылауды күшейту мен физикалық кедергілер қою мүмкін шаралардың қатарында екенін атап өтті. Ол Мароккоға қаржылай қолдау көрсетуді ұсынды, деп хабарлайды Tengrinews.kz DW басылымына сілтеме жасап.
Хат Гибралтар бұғазының Африка жағалауында орналасқан және Мароккомен шектесетін Испанияның Сеута автономды қаласына мигранттардың ағылуына жауап ретінде жолданды.

"Бұл оқиға ең осал тұстардағы шекараларымызды одан әрі нығайту үшін көбірек жұмыс істеуіміз керектігін анық көрсетеді", - деп атап өтті фон дер Ляйен.



Еурокомиссия басшысы ЕО елдеріне жолдаған хатында одақтың сыртқы шептерінде "бақылауды күшейту және қажет болған жағдайда физикалық кедергілерді пайдалану" мүмкіндігі туралы мәлімдеді. Құжат 4 тамызда Сеутадағы жағдайға байланысты өтетін ЕО Ішкі істер министрлерінің шұғыл отырысы қарсаңында жіберілді.
Фон дер Ляйеннің айтуынша, "барлық сыртқы шекараны қорғау - ортақ еуропалық жауапкершілік".
Хатта Frontex Еуропалық шекара бақылау агенттігінің Испанияның Сеута қаласындағы өз өкілдігін күшейтуге дайын екені айтылған. Брюссель Мароккоға техникалық және қаржылай қолдауды кеңейту мүмкіндігін қарастырып жатыр.
Фон дер Ляйен Мадридтің заңсыз миграцияны тежеу бойынша қадамдарын оң бағалап, Испания үкіметі қабылдаған "қосымша тежеу шараларын" атап өтті. Ол премьер-министр Педро Санческе дағдарысты реттеудегі іс-қимылдары үшін алғыс айтты.
Марокко Испанияға мигранттардың жаппай ағылуына не себеп болғанын түсіндірді