Оман Иранға Ормуз бұғазын басқару механизмін ұсынды
Оман Иранға Парсы шығанағы елдері қолдаған Ормуз бұғазын басқару жоспарын ұсынды. Құжат бұғаз арқылы өткені үшін ерікті түрде ақы төлеуді қарастырады, деп хабарлайды Tengrinews.kz тілшісі Reuters агенттігіне сілтеме жасап.
Оман Иранға ерікті жарналар есебінен қаржыландырылатын Ормуз бұғазын басқарудың бірлескен аймақтық тетігін құру туралы ұсыныс тастады. Бұл туралы сейсенбі, 28 шілдеде Парсы шығанағы елдеріндегі дереккөз хабарлады.
Бұл жүйе Азиядағы Малакка бұғазында қолданылатын тәртіпке ұқсас болмақ. Онда Индонезия, Малайзия және Сингапур кемелерден кеме қатынасын, қоршаған ортаны қорғауды және іздестіру-құтқару операцияларын қаржыландыру үшін ерікті жарна төлеуді сұрайды.
Жағдаймен таныс батыстық дипломат мұны әуе сапарлары кезіндегі көміртегі шығарындылары үшін төленетін ерікті салықпен салыстырды: билет сатып алушы өз шығарындыларының орнын толтыру үшін төлем жасағысы келсе, арнайы белгі қоя алады.
Оманның ұсыныстары АҚШ пен Израильдің Иранмен соғысы кезінде басталған бұғаздағы мұнай танкерлеріне жасалған шабуылдарды тоқтатуға негіз болуы тиіс.
Өткен демалыс күндері АҚШ-тың екі апталық бомбалау науқанын кенеттен тоқтатқан Президент Дональд Трамп Иранмен "нәтижелі келіссөздер" жүріп жатқанын мәлімдеді. Алайда ол келіссөздер нәтиже бермесе, соққыларды қайта бастайтынын ескертті.
Дегенмен, дүйсенбі күні Иран Ормуз бұғазын әлі де өз бақылауында ұстап отырғанын және Америка Құрама Штаттарымен келіссөздерді қайта бастауға ниетті емес екенін мәлімдеді.
28 ақпандағы АҚШ пен Израильдің шабуылынан кейін Иран бұғазды басқалар үшін іс жүзінде жауып тастады. Өткен айда АҚШ пен Иран арасында қол жеткізілген келісім оның жұмысын ішінара жандандырған болатын, бірақ шілде айының басында Иран Тегеран мақұлдамаған бағытты пайдаланған кемелерге оқ жаудырған соң, келісім күшін жойды.
Иранның мемлекеттік БАҚ-тары хабарлағандай, Иранның біріккен әскери қолбасшылығы Трамп ұсынған кемелерге өтемақыны Иранның бұғатталған активтерінен төлеу жоспарын тағы да қабылдамады. Онда мұндай төлемдерді қабылдаған кез келген елге немесе компанияға Иран қарулы күштері тарапынан Ормуз бұғазы арқылы өтуге тыйым салынатыны айтылған.