Қазақстандық Threads-тегі пікірлері үшін сотталды

Семей тұрғыны Threads әлеуметтік желісіндегі пікірлері үшін екі жылға бас бостандығынан айырылды, - деп хабарлайды Tengrinews.kz Абай облыстық сотына сілтеме жасап.
Қылмыстық істі Семей қаласының қылмыстық істер жөніндегі ауданаралық соты қарады. Іс материалдарына сәйкес, ер адам бір жарым жылға жуық уақыт бойы Threads әлеуметтік желісіндегі өзге қолданушылардың дін тақырыбындағы жазбаларына пікірлер қалдырып отырған.

"Қақтығыс туғызу мақсатында ол ұлттық және діни алауыздықты қоздыруға, азаматтардың дінге көзқарасы мен ұлттық тиесілілігіне байланысты ұлттық ар-намысы мен қадір-қасиетін қорлауға бағытталған пікірлерді қасақана жариялаған", - деп мәлімдеді сот.

Сот қандай жаза тағайындады?
Сотталушы кінәсін толық мойындап, өзіне бас бостандығынан айырумен байланысты емес жаза тағайындауды сұрады. Прокурор болса, керісінше, нақты мерзім беруді талап етті.
ҚР ҚК-нің 174-бабы (Әлеуметтік, ұлттық, рулық, нәсілдік немесе діни араздықты қоздыру) бойынша айыппұл салу, не 2 жылдан 7 жылға дейінгі мерзімге бас бостандығын шектеу немесе сол мерзімге бас бостандығынан айыру жазасы қарастырылған.

"Сот үкімі бойынша, И. ҚР ҚК-нің 174-бабы 1-бөлігі бойынша кінәлі деп танылды. Жеңілдететін мән-жайларды (істеген ісіне шын жүректен өкінуі, соттылығының болмауы, қылмыстық жауапкершілікке алғаш рет тартылуы, тұрғылықты жері мен жұмыс орнынан оң мінездеме берілуі) ескере отырып және ауырлататын мән-жайлардың болмауына байланысты оған 2 жыл мерзімге бас бостандығынан айыру жазасы тағайындалды", - деп хабарлады сот.