Әлем чемпионатының ашылуы кезінде арена маңында жанкүйер қайтыс болды
Мексикада 12 маусымға қараған түні өткен футболдан әлем чемпионатының ашылу салтанаты кезінде жанкүйерлердің бірі көз жұмды. БАҚ мәліметінше, ол Германия азаматы болып шықты, - деп хабарлайды Tengri Sport.
Әлеуметтік желілерде дәрігерлердің ес-түссіз жатқан белгісіз ер адамға алғашқы көмек көрсетіп жатқан видеосы тарады. Оны аман алып қалу мүмкін болмаған.
"Қолда бар мәліметтерге сәйкес, марқұм Германия азаматы болып шықты. Ол стадионға бара жатқан жолда өзін жайсыз сезінген. Оқиға орнына жедел жәрдем қызметкерлері шұғыл жетіп, зардап шегушіні мамандандырылған медициналық орталыққа жеткізген, алайда кейінірек оның өлімі расталды. Алғашқы хабарламаларда құрбанның жасы туралы мәліметтер әртүрлі болғанымен, билік пен жергілікті БАҚ оның 2026 жылғы әлем чемпионатының ашылуына қатысу үшін Мексикаға арнайы келген Германия азаматы екенін растады. Оның жеке басы әзірге жарияланған жоқ, сондай-ақ медициналық тарихы туралы қосымша ақпарат берілмеді", - деп жазады minuto60.com.
Әлеуметтік желілерде ер адамның 80 жастан асқандығы айтылып жатыр.
Әлем чемпионатында кісі өлімі тіркелді. Шамамен 80 жастағы неміс жанкүйері стадионға кірер алдында инфаркт алды, оқиға орнында реанимациялық шаралар жүргізіліп, ауруханаға жеткізілгенімен, ол қайтыс болды.#LuceroÁlvarez #mundial #muerte #mexico #fallecimiento #Mundial2026 pic.twitter.com/kAelTljoJd
— Lucero Álvarez News (@_LuceroAlvarez) 11 маусым, 2026
ӘЧ-2026 ашылу салтанаты
Айта кетейік, қайғылы жағдай әлем чемпионатының ашылу матчі өткен Мексикадағы "Ацтека" стадионындағы мерекелік көңіл-күйге әсер етпеген.
Салтанатты шараның басты тақырыбы дәстүрлі мексикалық папье-пикадо өнері болды. Шоу әлем чемпионатының қожайыны болған елдің мәдени мұрасын паш етті.
Рәсімнің соңында әнші Шакира мен Burna Boy алғаш рет турнирдің "Dai Dai" атты ресми гимнін бірге орындады.