Пластик терезелер мен есік: Маңғыстауда жартастағы мешіт бұрынғы қалпына келтірілді
Маңғыстау облысының Түпқараған ауданында орналасқан көне Қапам ата жартас мешіті бастапқы қалпына келтірілді, деп хабарлайды Tengrinews.kz тілшісі Lada.kz сайтына сілтеме жасап.
Басылым материалда Таушық ауылының әкімі Нұржан Бақтыбаевтың ақпаратын келтіреді.
Оның айтуынша, шыныпакеттер бөлшектелген. Ол жүргізілген жұмыстардың егжей-тегжейін хабарламаған.
Сонымен қатар материалда кей тұрғындар келушілерге қолайлы болуы үшін нысанның бірегей келбетін жоғалтуына қарсы емес екені жазылған. Олар бұл жерге қыста келеді, сондықтан жайлылық үшін аяз бен желден қорғаныс қажет деп санайды.
Алайда мұндай "жаңарту" нысанның тарихи-мәдени ескерткіш ретіндегі құндылығын жояды. Облыстық әкімдіктің мәлімдемесіне сәйкес, мешітті мемлекеттік қорғауға алынатын жергілікті маңызы бар нысандар тізіміне енгізу мәселесі шешіліп жатыр. Ол үшін өткен жазда сараптама жүргізіліп, оның тарихи-мәдени құндылығы расталған еді. Бірақ желтоқсан айына қарай мұнда пластик терезелер мен есіктер пайда болған.
Билік мешіттегі "жөндеуді" вандализм актісі деп бағалады. Құрылымдарды бөлшектеуге міндеттеу үшін заңбұзушыларды іздестірілді. Кінәліге ӘҚБтК 145-бабы ("Қазақстан Республикасының тарихи-мәдени мұра объектілерін қорғау және пайдалану туралы заңнамасын бұзу") бойынша 10-нан 200 АЕК-ке дейін (43 250-ден 865 000 теңгеге дейін) айыппұл салынуы мүмкін.
Мешіт Таушық ауылынан солтүстік-батысқа қарай 22 шақырым жерде орналасқан және XIX ғасырға жатады. Бұл - XIX ғасырдағы аймақтың сопылық және дәстүрлі діни тәжірибелерімен байланысты жерасты ғибадат орны. Құрылыс жұмсақ тау жынысын қашап жасалған және ашық шөлді-далалық аймақтағы тік жартастың бойында орналасқан.