ШҚО әкімінің экс-орынбасары Жақсылық Омар сот үкімін даулай алмады

Шығыс Қазақстан облыстық сотының қылмыстық істер жөніндегі сот алқасы сотталған экс-әкім орынбасары Жақсылық Омардың қорғаушысының апелляциялық шағымын қарады, деп хабарлайды Tengrinews.kz.
Сот алқасы Өскемен қаласының қылмыстық істер жөніндегі ауданаралық сотының 2026 жылғы 3 сәуірдегі Жақсылық Омарға қатысты үкімін өзгеріссіз қалдыруға, апелляциялық шағымдарды қанағаттандырмауға қаулы етті.

"Сот алқасы бірінші сатыдағы сот сотталушының іс-әрекетін дұрыс саралаған деген қорытындыға келді. Жазаның түрі мен көлемі заң талаптарына сәйкес, мемлекеттік биліктің беделіне және қоғамның оған деген сеніміне нұқсан келтіретін, жасалған ауыр сыбайлас жемқорлық қылмысының қоғамдық қауіптілігінің жоғары дәрежесі ескеріле отырып тағайындалған. (...) Қаулы жарияланған сәттен бастап заңды күшіне енеді", - деп қаулы етті судья Сәуле Бекішева.

Айта кетейік, сотталған экс-шенеунік бүгін сот алқасының отырысына қатысқан жоқ.
Фото сот залынан: Tengrinews.kz
Еске сала кетейік, Шығыс Қазақстан әкімінің бұрынғы орынбасары Жақсылық Омар тағылған барлық баптар бойынша ауыр сыбайлас жемқорлық іс-әрекеттерін жасағаны үшін кінәлі деп танылып, нақты түрме мерзіміне сотталған болатын.
Оған екі эпизод бойынша айып тағылды: 20 миллион теңге пара алу және көлікке қатысты айла-шарғы жасау. Тергеу нұсқасы бойынша, ол Өскемен әкімі болып тұрған кезде танысын кәсіпорыннан демеушілік көмек ретінде көлік рәсімдеуге көндірген. Кейінірек алынған Toyota Camry 75 үшінші тұлғаларға қайта рәсімделіп, шенеуніктің жеке пайдалануы үшін trade-in бағдарламасы бойынша жаңа модельге айырбасталған. Шығын көлемі 13 миллион теңгені құраған.
3 сәуірде Өскемен қаласының қылмыстық істер жөніндегі ауданаралық соты Жақсылық Омарды алаяқтық пен жемқорлық үшін кінәлі деп танып, орташа қауіпсіздік мекемесінде 6 жылға бас бостандығынан айыруға үкім кесті. Оның Toyota Camry автокөлігі тәркіленіп, "Құрмет" орденінен, сондай-ақ мемлекеттік қызметте лауазымдарды атқару құқығынан айырылды.
ШҚО прокуратурасы бұған дейін Омардың іс-әрекеттері мемлекеттік қызмет принциптеріне және қоғамдық сенімге нұқсан келтіретінін атап өтіп, сыбайлас жемқорлық қылмыстары үшін сотталған адамдарға рақымшылық жасалмайтынын және олардың шартты түрде мерзімінен бұрын босатылуы мүмкін еместігін баса айтқан болатын.
Экс-шенеунік бірінші сатыдағы соттың шешімімен келіспеді. Үкім шыққанға дейін ол соттан өзін бас бостандығынан айырмауды, оның орнына айыппұл түрінде жаза тағайындауды сұраған еді. Үкім шыққаннан кейін Жақсылық Омар оған шағым түсірді.
Жақсылық Омар 2018 жылғы тамыздан 2024 жылғы қарашаға дейін Өскемен қаласының әкімі қызметін атқарды. 2025 жылғы сәуірде ол Шығыс Қазақстан облысы әкімінің бірінші орынбасары лауазымына тағайындалған болатын.
Тағы оқыңыздар: Жақсылық Омар рақымшылық бойынша және мерзімінен бұрын шартты түрде босатылмайды - прокуратура
ШҚО әкімдігінде сотталған Жақсылық Омардың орнына әлі де адам табылмаған: себебі айтылды