Қазақстанда донорлық қанды тексеру үшін QR-кодтар енгізілді
Республикалық қан орталығында қан компоненттерінің заттаңбаларына QR-кодтар орналастырылған ScanQAN цифрлық жүйесі енгізілді. Бұл технология қан құю қауіпсіздігін арттыруға және адами факторға байланысты тәуекелдерді азайтуға көмектеседі деп хабарлайды TengriHealth Денсаулық сақтау министрлігіне сілтеме жасап.
Жаңа жүйе қалай жұмыс істейді?
Енді қан компоненттерінің заттаңбаларында QR-кодтар орналастырылады. Оны сканерлегеннен кейін медицина қызметкері қан компоненті туралы толық ақпаратты жедел ала алады.
Жүйеде мыналар көрсетіледі:
зертханалық зерттеулердің нәтижелері;қан компонентінің сипаттамалары;сақтау шарттары;қолдану ерекшеліктері;өзекті клиникалық ұсынымдар.
Денсаулық сақтау министрлігі ақпаратынша, QR-кодтар қан компоненттерін дайындау мен сақтаудан бастап, пациентке беру және қан құюға дейінгі барлық кезеңдерде дәл бақылауға мүмкіндік береді.
QR-кодтар не үшін енгізілді?
Министрлік бұл цифрлық шешім медициналық көмектің қауіпсіздік стандарттарын арттыруы тиіс екенін атап өтті.
"Цифрлық көмекшіні пайдалану медицина мамандарына клиникалық жағдайларды тезірек бағдарлауға, әрбір қан компоненті бойынша кеңейтілген ақпаратты, соның ішінде әртүрлі клиникалық жағдайларда қолдану көрсеткіштерін, шектеулері мен ұсынымдарын алуға мүмкіндік береді", - делінген хабарламада.
Республикалық қан орталығында ScanQAN жүйесінен бөлек, сапа менеджменті жүйесінің қосымша цифрлық құралдары енгізілген.