Энрике Сересо: Арсенални Мадридда кечки тушлик кутмоқда
Атлетико Мадрид президенти Энрике Сересо Чемпионлар лигаси ярим финали доирасидаги Арсеналга қарши жавоб учрашуви олдидан ҳазиломуз тарзда рақиб жамоани Мадридда ўзига хос «қасос» кутаётганини маълум қилди. Лондонликларнинг тушликни соат 11:30 да белгилагани испаниялик функционерни ҳайратда қолдирди, чунки Мадридда овқатланиш одатлари анча кечроқ вақтга тўғри келади. Бу ҳақда Goal.com хабар беради.
Сересо матбуотга берган интервюсида: «Улар Мадридга келганларида, биз тушликни соат 15:00 га белгилаймиз», — дея ҳазил қилди. Бироқ, ҳазиллардан ташқари, жамоа асосий эътиборини ўйинга қаратган. Биринчи ўйинда қайд этилган 1:1 ҳисобидан сўнг, Диего Симеоне шогирдлари финал йўлланмаси учун бор кучларини ишга солишга тайёр.
Президент жамоанинг имкониятларига юқори баҳо бериб, футболчиларда босим бўлишига қарамай, хотиржамлик ва ишонч сақланиб қолаётганини таъкидлади. Унинг сўзларига кўра, Атлетико бундай муҳим ўйинларга ўрганиб қолган ва тарихни такрорлашга қодир. Шунингдек, жароҳатидан фориғ бўлган ҳужумчи Жулиан Алварезнинг таркибга қайтиши жамоа салоҳиятини янада оширган.
Агар Атлетико Мадрид ушбу босқичдан муваффақиятли ўтса, финалда Бавария ёки ПСЖ жуфтлиги ғолиби билан тўқнаш келади. Финалга чиқиш клуб учун тарихий воқеа бўлиши кутилмоқда ва жамоа аъзолари бу имкониятдан унумли фойдаланишга аҳд қилишган.