ПайПал сунъий интеллект ёрдамида қайта тикланмоқчи
ПайПал компанияси акциялар нархининг тушиши ва кутилаётган қисқартиришларга қарамай, келажакка умид билан қарамоқда. Компания бош директори Энрике Лорес инвесторлар олдидаги ҳисоботида ПайПал яна «технологик компанияга айланиши» кераклигини таъкидлади. Бу ўзгаришлар сунъий интеллект (АИ) технологияларини бизнес жараёнларига фаол татбиқ этишни назарда тутади. Бу ҳақда Techcrunch.com хабар беради.
Лореснинг сўзларига кўра, компания ўз технологик платформасини модернизация қилиш, «cлоуд-нативе» тизимига ўтиш ва дастурий таъминотни ишлаб чиқиш жараёнларида сунъий интеллектдан агрессив фойдаланишни режалаштирмоқда. Бу қадамлар дастурчилар унумдорлигини ошириш ва маҳсулотларни бозорга чиқариш муддатини қисқартиришга хизмат қилади.
Компания доирасида «АИ трансформацияси ва соддалаштириш» бўйича янги гуруҳ тузилди. Ушбу стратегия, шунингдек, ташкилий тузилмани оптималлаштириш билан биргаликда, келгуси икки-уч йил ичида 1,5 миллиард доллардан ортиқ маблағни тежаш имконини бериши кутилмоқда. ПайПал харажатларни камайтириш мақсадида иш ўринларини қисқартиришни ҳам кўзда тутган.
Сунъий интеллект фақат код ёзиш билан чекланиб қолмайди. ПайПал уни мижозларга хизмат кўрсатиш, қўллаб-қувватлаш операциялари ва хавфларни бошқариш каби муҳим йўналишларда ҳам қўлламоқчи. Лореснинг таъкидлашича, бу шунчаки технологик тажриба эмас, балки компаниянинг асосий бизнес жараёнларини тубдан қайта лойиҳалашдир.