Германияда автомобиль пиёдалар устига юриб кетди
Германиянинг Лейпциг шаҳри марказида жойлашган Гриммайшештрассе кўчасида фожиали йўл ҳодисаси содир бўлди. Маълумотларга кўра, автомобиль пиёдалар устига юриб кетган.
Дастлабки хабарларга кўра, икки нафар киши ҳалок бўлган ва бир нечта фуқаро турли даражада жароҳат олган. Бу ҳақда BR радиоси шаҳар мэри Буркхард Юнгга таяниб маълум қилган.
Гувоҳларнинг айтишича, Volkswagen SUV русумли машина юқори тезликда пиёдалар йўлакчасига кириб борган.
Ҳодиса жойида бир неча жасадлар ёпиб қўйилгани ва жароҳатланганлар борлиги қайд этилган. Саксония полицияси ҳайдовчи қўлга олинганини расман эълон қилди.
Ҳозирда ҳуқуқни муҳофаза қилувчи органлар томонидан тергов ҳаракатлари давом эттирилмоқда. Фуқароларга ҳушёр бўлиш ва зарур ҳолатларда расмий кўрсатмаларга амал қилиш тавсия этилмоқда.