Rolls-Royce компанияси янги моделдаги икки ўринли элетромобилини намойиш қилди

Ҳашаматли автомобиллар ишлаб чиқарувчи Rolls-Royce компанияси икки ўринли янги электр кабриолет моделини тақдим этди.

BMW концернига қарашли бренд ушбу автомобилни Буюк Британиянинг Гудвуд шаҳрида жойлашган заводда қўлда йиғади. “Project Nightingale” деб номланган модель 2028 йилдан бошлаб мижозларга етказиб берилиши режалаштирилган бўлиб, жами 100 дона ишлаб чиқарилади.

Компания маълумотига кўра, электромобиль тўлиқ электр двигателда ҳаракатланади ва шу сабабли деярли шовқинсиз ишлаши билан ажралиб туради.

Аввалроқ Rolls-Royce 2030 йилдан фақат электромобилларга ўтиш режасини қайта кўриб чиққан ва келгусида бензинли двигателли автомобилларни ҳам ишлаб чиқаришни давом эттиришини билдирган эди.

“Project Nightingale” узунлиги 5,76 метрни ташкил этади ва ўлчами жиҳатидан Пҳантом моделига яқин. Автомобиль дизайнида узун капот ва “торпедасимон” шакл асосий ўрин тутади.

Дизайн концепцияси 1920 йиллардаги ЭХ серияси тажриба автомобиллари ҳамда арт-деко услубидан илҳомланган.

Rolls-Royce Motor Cars бош директори Крис Браунрижнинг таъкидлашича, янги лойиҳа бренд мижозларининг энг юқори даражадаги талабларига жавоб сифатида яратилган.

Компания автомобиль нархини ошкор қилмаган, бироқ у жуда юқори қийматли эксклюзив сегментга мансуб бўлиши, яъни 500 мингдан 20 миллион фунтгача бўлган бозор оралиғида жойлашиши мумкинлиги айтилмоқда.