Сурхондарё ва Хоразмда йирик наркотик партияси ушланди

Давлат хавфсизлик хизматининг Сурхондарё ва Хоразм вилоятлари бўйича бошқармалари томонидан ўтказилган тезкор тадбирлар давомида икки йирик ҳолатда катта миқдордаги гиёҳванд моддалар фош этилди.

Биринчи ҳолатда Қўшкўпир туманида яшовчи, 1985 йилда туғилган ва аввал судланган шахс Урганч тумани ҳудудида тўхтатилиб текширилганда унинг ёнидан 4 кг 407 грамм “опий” моддаси аниқланди ва ашёвий далил сифатида расмийлаштирилди.

Иккинчи ҳолатда “Беруний–Урганч” йўналишида ҳаракатланаётган “Ласетти” автомобили Урганч туманидаги “Чолиш” ЙПХ масканида тўхтатилиб текширилган. Унда бўлган, 2002 йилда туғилган ва муқаддам судланган шахсга тегишли 4 кг 541 грамм “опий” моддаси борлиги аниқланган.

Тергов маълумотларига кўра, ҳар икки ҳолатдаги гумонланувчилар Афғонистондан контрабанда йўли билан олиб кирилган наркотик моддаларни Хоразм вилояти ҳудудида сотишни режалаштирган.

Ҳозирда уларга нисбатан Жиноят кодексининг тегишли моддалари бўйича жиноят ишлари қўзғатилган ва суд қарори билан қамоққа олиш эҳтиёт чораси қўлланган. Тергов ҳаракатлари давом этмоқда.

Расмийлар фуқароларни бундай ҳолатларга бефарқ бўлмасликка чақириб, 1520 қисқа рақами орқали зудлик билан хабар бериш мумкинлигини эслатди. Шахсий маълумотлар махфийлиги тўлиқ кафолатланиши таъкидланди.