Татарстанда Ык елгасы аша салынган күперне су баскан
Татарстанның Азнакай районында, Тымытык торак пункты янында Ык елгасы аша салынган күпер су астында калган.
Россия Гадәттән тыш хәлләр министрлыгының ТР буенча Баш идарәсе матбугат хезмәтендә «Татар-информ» агентлыгына хәбәр итүләренчә, торак йортлар су баскан зонага эләкми, ә торак пункт белән транспорт элемтәсе өзелмәгән. Шул ук вакытта Башкортстанның Октябрьский шәһәре аша урап узу маршруты планлаштырылган.
Хәзерге вакытта күпер буенча машиналар хәрәкәте туктатылган, тиешле билгеләр куелган, ә җирле халыкка чикләүләр турында хәбәр ителгән.