Чернышов клиентлар ризалыгыннан башка кредит тәкъдимнәрен таратуны тыярга тәкъдим итте
Дәүләт Думасы вице-спикеры Борис Чернышов Россия Банкы рәисе Эльвира Нәбиуллинага гражданнарның турыдан-туры ризалыгыннан башка кредит тәкъдимнәрен җибәрүне чикләү тәкъдиме белән хат юллады. Бу хакта «ТАСС» хәбәр итә.
Чернышов банклар мондый тәкъдимнәрне клиентның ачык ризалыгы булганда гына җибәрә алачак дигән кагыйдәне билгеләргә тәкъдим итә. Моннан тыш, ул гражданнарга кредит оешмасының яки интернет-банкның мобиль кушымтасы аша мондый белдерүләрдән баш тарту мөмкинлеген бирергә кирәк дип саный.
Хатта билгеләп үтелгәнчә, банклар финанс продуктларын таныту өчен дистанцион элемтә каналларын актив куллана. Клиентларга «Сезгә кредит хупланды» яки «Кредит буенча шәхси тәкъдим» формулировкалары белән хәбәрләр җибәрәләр, шулай ук тәкъдимнәрне кушымталарның шәхси кабинетларына урнаштыралар.
Депутат фикеренчә, мондый белдерүләр озак вакытлы нәтиҗәләрен бәяләмичә импульсив карарлар кабул итүгә этәрә ала. «Арзан» кредитлар турында даими искәртүләр бурычлар артуга, гаиләләрнең финанс хәле начараюга һәм икътисади тотрыклылыкның кимүенә китерергә сәләтле, дип саный ул.