Андрей Никитин Татарстан юллар үсешенә 12,5 млрд сум алачак дип белдерде
Быел Татарстан юллар үсешенә 12,5 млрд сум алачак, дип сөйләде видеоэлемтә буенча Россия транспорт министры Андрей Никитин ТР Транспорт министрлыгы коллегиясе утырышында.
«Татарстан – Россиянең танылган технологик, туристик һәм мәдәни үзәкләренең берсе. Регионның транспорты һәм юл хуҗалыгы – Россия территориясенең бәйлелеген тәэмин итүнең мөһим элементы. Гражданнарыбызның тормыш сыйфатын күтәрү турыдан-туры шуңа бәйле. Бу бурычларны безнең алга РФ Президенты Владимир Путин куйды. Без аларны гамәлгә ашырабыз, шул исәптән «Нәтиҗәле транспорт системасы» һәм «Тормыш өчен инфраструктура» илкүләм проектлары кысаларында, – дип белдерде ул.
Никитин сүзләренчә, республикада җирле юлларның 73 проценты норматив хәлдә.
«Бу – Россиядә иң яхшы күрсәткечләрнең берсе», - диде ул.
Транспорт министрлыгы башлыгы билгеләп үткәнчә, Татарстан 2025 елның сентябрендә 2030 елга кадәр җәмәгать транспортын үстерү программасын раслап, Россия Президенты йөкләмәсен беренчеләрдән булып үтәде.