Министр Кулубаев АКШ менен виза маселеси талкууланып жатканын билдирди
Кыргызстандын Тышкы иштер министрлиги (ТИМ) учурда АКШ өкмөтү менен визага күрөө талап кылынган жаңы жобо боюнча консультацияларды жүргүзүүдө. Бул тууралуу министр Жээнбек Кулубаев 15-январда жыл жыйынтыгы тууралуу маалымат жыйынында билдирди.
Министр 15 миң доллар кыргызстандыктар үчүн көп сумма экенин белгилеп, бирок ошол эле учурда Кыргызстан АКШнын ички саясатына таасир эте албасын айтты.
"Бул чечим АКШ администрациясынын миграциялык саясатынын бир бөлүгү жана ал көптөгөн өлкөлөргө тиешелүү. Ошондуктан биз ага түздөн-түз таасир эте албайбыз, бул америкалык тараптын ички саясаты. Ушундай эле миграциялык саясатты биздин орусиялык өнөктөштөрүбүз да жүргүзүп жатышат, биз алар менен да сүйлөшүп жатабыз", - деди ал.
Кулубаев ошондой эле АКШ тарап менен сүйлөшүүлөр уланып, виза режимин жеңилдетүү боюнча консультациялар жүрүп жатканын айтты. Министр эң башкысы АКШ визасын алган кыргызстандык жарандар ал өлкөнүн бардык талаптарын аткарып, документтерди так толтуруп, ал жактан мөөнөтүнөн кечикпей чыгып кетүүсү зарыл болуп турганын баса белгиледи.
"Көп көйгөйлөр айрым жаштар АКШда мыйзамсыз кала берип жаткандыгынан улам чыгууда. Биз өзүбүздүн тийиштүү мекемелер менен бул жаатта иш алып барып жатабыз", - деди Кулубаев.
6-январда Дональд Трамптын администрациясы Кошмо Штаттарга кирүү үчүн күрөө төлөй турган мамлекеттердин тизмесине Кыргызстанды кошкону маалым болгон.
Мамдепартаменттин сайтында белгиленгендей, тизмедеги мамлекеттердин жарандары B1/B2 (туристтик жана иш сапар визасы) визаларын алуу үчүн арыз тапшырып, жарактуу деп табылса 5, 10 же 15 миң доллар өлчөмүндө күрөө (visa bond) төлөөгө милдеттүү болот. Күрөөнүн көлөмүн маектин жүрүшүндө консул аныктайт.
Бул эреже 21-январда күчүнө кирери маалымдалган. 21-январдан тартып иштей турган дагы бир эреже тууралуу 14-январда маалым болду. Ага ылайык, АКШнын Мамлекеттик департаменти 75 өлкөнүн, анын ичинде Кыргызстандын жарандарына иммиграциялык виза берүүнү убактылуу токтотот. 75 өлкөнүн арасында Казакстан, Өзбекстан, Азербайжан, Орусия, Грузия, Молдова, Сомали, Ооганстан, Иран, Египет, Ирак жана башкалар бар.
АКШнын консулдук кызматкерлерине ошол мамлекеттердин жарандарына виза берүүдөн баш тартуу буйругу берилгени кабарланган. (ZKo)