Бүген Яңа Арыш авылында яңа төзелүче мәчеткә манара һәм ай куйдылар-Фотолар
Бүгенге җомга көнендә Яңа Арыш халкы олы бәйрәмгә җыелды. Авылдагы яңа мәчетнең манарасы һәм аен күтәрү чарасына кунаклар да , авыл халкы да күпләп килгән иделәр.
Яңа мәчет бинасын торгызу идеясы моннан өч ел элек , авылның Сабантуенда , шушы җирлектән район Советы депутаты , Татарстан Президенты каршындагы мәдәниятны үстерү фонды директоры. якташыбыз Нурия Хашимова башлангычында туган.Һәм ул бу чакыруны хуплаган хәлдә мәчетнең хәэрия фондына үзеннән беренче сәдака акчасын керткән. Яңаарышлылар әлеге изге башлангычны бердәм хуплап алганнар. Менә шуннан башланган саваплы гамәлләр: кем ничек булдыра алган -барысы да үзенчә ярдәм кулы сузганнар. Араларында миллион ярым сум кертүче дә булган, аннан килә биш, ике, йөз, иллешәр мең бирүчеләр дә шактый җыелган. Без алар хакында газетабыздагы язмабызда киңрәк тукталырбыз әле. Бердәмлек тау кичерә диеп, юкка гына әйтмиләрдер. Бу очракта да нәтиҗәсе күз алдында, бик олы, зәвыклы, затлы Аллаһ йорты барлыкка килгән авылда. Алда бәян ителгәнчә, бүген яңа мәчеткә манара һәм ай куелды. Яңаарышлыларны әлеге шатлыклы вакыйга уңаеннан Татарстан мөфтиенең беренче урынбасары Рөстәм хәзрәт Хайруллин, ТР Президенты каршындагы мәдәниятны үстерүгә" Ярдәм" фонды директоры Нурия Хашимова, Балык Бистәсе районының мөфтие Сәүдахан хәзрәт Гайнетдинов, район башлыгы аппараты җитәкчелеге вәкилләре тәбрикләделәр. Аннан авылның иске мәчетендә җомга намазы укылды, кунак хәзрәтләренең вәгазе тынланды.
Вазыйх Фатыйхов.
Автор фотолары.