Швейцариядағы барда шыққан өрт салдарынан қаза болғандар арасында жасөспірімдер бар

1 қаңтарға қараған түні Швейцарияның Кран-Монтана тау-шаңғы курортындағы Le Constellation барында шыққан өрт салдарынан мерт болғандар арасында жасөспірімдер де бар.

Reuters агенттігі полиция дерегіне сүйеніп, өртте қаза тапқандар арасында тағы 16 адамның аты-жөні жексенбіде анықталған деп жазды. Олар – Швейцария, Италия, Франция, Түркия және Румыния азаматтары. Арасында 16 мен 18 аралығындағы 10 жасөспірім бар. Ең кішісі – 14 жастағы Швейцария азаматы. Қаза тапқандар арасында 15 жастағы екі қыз болған.

Қазірге дейін полиция өрт салдарынан көз жұмған 24 адамның кім екенін анықтаған. Сүйек анықтау жұмыстары әлі жалғасып жатыр.

Сенбі күні прокуратура өрт шыққан бардың екі иесіне қатысты тергеу басталғанын хабарлаған. Олар абайсызда адам өлтіру және денсаулыққа абайсызда зиян келтіру баптары бойынша күдікке ілінген.

Le Constellation барында шыққан өрт салдарынан 40-қа жуық адам қаза тауып, тағы 119 кісі түрлі жарақат алған, олардың ішінде қатты күйіп қалғандар да бар. Бұған дейін БАҚ өрттің шығуына пиротехника құралдары себеп болған болуы мүмкін деп жазған.

Альпі тауында орналасқан Кран-Монтана қаласы шаңғы тебуге қолайлы курорт ретінде ғана емес, сонымен бірге әуесқой гольфшілер арасында да танымал. Le Constellation барындағы өрт Швейцарияның қазіргі заманғы тарихындағы ең ірі қасіретті оқиға аталып отыр.

Көп адамның қазасына себеп болған қайғылы оқиғаға байланысты Швейцарияда бес күндік аза тұту жарияланған.