Дар Тоҷикистон аз соли оянда дастаҳои занонаи футбол рақобат мекунанд
Мавсими нави лигаи олии футболи Тоҷикистон бо ширкати 12 даста 6-уми марти соли 2026 оғоз меёбад. Ин тасмим дар ҷаласаи кумитаи иҷроияи Федератсияи футболи Тоҷикистон, ки 20-уми декабр дар шаҳри Душанбе доир гардид, гирифта шуд.
Ҳамчунин тартиби нав барои маҳдудияти бозигарони хориҷӣ низ тасдиқ гардид. Дар мавсими 2026 ҳар як бошгоҳи лигаи олӣ метавонад то ҳафт бозигари хориҷиро ба дархост ворид карда, дар як вақт панҷ легионерро ба майдон барорад.
Варзишгоҳи марказии Ҳисор ҳамчун макони баргузории бозии Суперҷоми Тоҷикистон-2026 байни қаҳрамони кишвар - «Истиқлол»-и Душанбе ва барандаи Ҷоми Тоҷикистон - «Регар-ТадАЗ»-и Турсунзода - тасдиқ шуд. Бозӣ 23-уми май баргузор мешавад.
Ғайр аз ин, кумитаи иҷроияи ФФТ баргузории бозиҳои даврҳои 1/8- ниҳоӣ, чорякниҳоӣ ва ниманиҳоии Ҷоми Тоҷикистон-2026-ро тасдиқ кард, ки дар ҳар як марҳила дастаҳо ду бозӣ мекунанд. Бозии ниҳоии мусобиқа дар варзишгоҳи «Вахш-Арена»-и шаҳри Бохтар доир хоҳад шуд.
Бо тавсияи кумитаи иҷроия Лигаи футболи Тоҷикистон бояд бунёди ҷоизавии Ҷоми Тоҷикистонро зиёд карда, мукофотпулиро барои мусобиқаи қаҳрамонии кишвар байни дастаҳои лигаи олӣ таъсис диҳад.
Аз мавсими нав сар карда, ҳар як бошгоҳи лигаи олӣ бояд як бозигари ҷавони соли таваллудаш 2008 ё ҷавонтарро ба ҳайати асосӣ дохил кунад. Ин бозигарро ҳангоми вохӯрӣ танҳо бо ҳамсолаш иваз кардан мумкин аст.
Тибқи қарори кумитаи иҷроияи ФФТ аз соли 2027 сар карда, бошгоҳҳои лигаи олии Тоҷикистон бояд дастаҳои занона дошта бошанд. Тавсия дода шуд, ки ин талабот аз соли 2026 ҳамчун лоиҳаи озмоишӣ санҷида шавад.
Дар ҷаласа ба рушди футзал дар кишвар таваҷҷуҳи махсус зоҳир гардид. Ба Кумитаи ҷавонон ва варзиши Тоҷикистон тавсия дода шуд, ки дар мактабҳои махсуси футбол дар саросари кишвар гурӯҳҳои футзалро ташкил кунанд.